‘उहाँको जन्म २००७ साल श्रावण १७ गते म्याग्दी जिल्लाको दर्वाङ–२ हाल मालिका गाउँपालिका रातो ढुंगामा बुबा नयन्त्र प्रसाद शेरचन र आमा सुनकुमारीबाट भएको थियो। संभ्रान्त परिवारमा जन्मेर पनि विद्यार्थी जीवनदेखि नै सर्वहारा वर्गको मुक्ति लागि सम्पूर्ण जीवन अर्पण गर्नुभयो’ विज्ञप्तिमा भनिएको छ।  

‘कमरेड स्वनामले २०२५ सालमा कम्युनिष्ट पार्टीको सदस्यता प्राप्त गर्नुभएको थियो। २०३३ सालमा उहाँकै नेतृत्वमा सर्वहारा कम्युनिष्ट लिग गठन भयो। २०३८ सालमा सर्वहारा श्रमिक संगठन नेपाल निर्माण गरी उहाँले किसान आन्दोलन चलाउनुभयो’ उनले भनेका छन्, ‘कमरेड शेरचनको आदर्शपूर्ण पक्ष नै आन्दोलनप्रतिको समर्पण, वर्गीय मुक्ति, देशभक्ति र निजी स्वार्थको तिलाञ्जली थियो। उहाँका यिनै आदर्श कम्युनिष्ट आन्दोलनका लागि प्रेरणादायी र अनुकरणीय हुनेछन्।’

कोरोना संक्रमण भएपछि उनलाई असोजमा पाटन स्वास्थ्य विज्ञान प्रतिष्ठान ललितपुरमा भर्ना गरिएको थियो। फेरि उनको स्वास्थ्यमा समस्या आएपछि कोठमाडौंस्थित मोडल हस्पिटलको आइसियुमा राखिएको थियो। उनको त्यहीँ प्राण गएको हो। कोरोना संक्रमणमुक्त भए पनि उनमा बारम्बार निमोनियाको समस्या देखिएको थियो। उनका दुवै मिर्गौला फेरिएका थिए।

बुढेसकालमा किरण गौतमसँग विवाह गरेका उनका सन्तान छैनन्।  म्याग्दीको अर्मनमा १७ साउन २००७ मा उनको जन्म भएको थियो। 

२०३५ सालतिर खगेन्द्र संग्रौलासँग मिलेर सर्वहारा कम्युनिस्ट लिग खोलेका यिनले पछि रूपलाल विश्वकर्माको मजदुर किसान संगठनसँग पार्टी एकता गरेका थिए। त्यसपछि संग्रौला अलग्गिएका थिए। उनी भने एकता केन्द्र मसाल हुँदै माओवादी केन्द्रमा संगठित भएका थिए। एक आदर्श व्यक्तिका रूपमा परिचित स्वनाम पछिल्लो समय रोगले थलिएका थिए।