प्रधानमन्त्री प्रचण्डले आफनो चीन भ्रमणको मुख्य एजेन्डा नै तातोपानी भन्सार नाका खुलाउने र अरनिको राजमार्ग विस्तार गर्ने चीनसँगको सम्झौता कार्यान्वयनमा लैजाने रहेको पनि स्पष्ट पारे। तातोपानी भन्सार नाका खुलाउन कूटनीतिक पहल गरिदिन आग्रह गर्दै बुधबार बिहान बालुवाटार पुगेका नेपाल ट्रक कन्टेनर व्यवसायी संघका पदाधिकारीसँगको सामूहिक भेटमा उनले तातोपानी नाका खुलाउन आफूले पटक पटक पहल गरिरहेको बताए।  

प्रधानमन्त्री प्रचण्ड बिहीबारदेखि चीन भ्रमणमा जाँदैछन्। प्रधानमन्त्रीले सोही भ्रमणका क्रममा तातोपानी भन्सार नाका खुलाउन र अरनिको राजमार्ग विस्तार गर्ने सम्झौता कार्यान्वयन गर्न चिनियाँ राष्ट्रपति समक्ष कुरा गर्ने प्रतिवद्धता पनि व्यक्त गरे।

उनले तातोपानी नाका नेपाल–चीन सम्बन्धको आधार तथा नेपालको आर्थिक समृद्धिको पनि आधारमा भएकाले यसबारे सरकार बेखबर हुने कुरै नआउने पनि उल्लेख गरे। प्रधानमन्त्रीले तातोपानी भन्सार नाका खुलाउने विषयलाई परराष्ट्र मन्त्रालयले पनि उच्च प्राथमिकता दिएको र आफूले पनि पटक पटक चिनियाँ दूतावासमार्फत सो समस्या समाधानका लागि पहल गरिरहेको पनि बताए।

सो अवसरमा कन्टेनर व्यवसायीहरुले तातोपानी नाका ठप्प हुँदा चीनसँगको व्यापार ठप्प भएको र त्यसैमा आश्रित रहेका १५ सय भन्दा बढी कन्टेनर व्यवसायी विस्थापित हुने अवस्था आउँदा समेत सरकारले बेवास्ता गरेको गुनासो गरेका थिए।

२०७२ साल बैशाख १२ गतेको भूकम्पपछि तातोपानी भन्सार नाका बन्द भएको थियो। व्यवसायीहरुले त्यसयता सरकारले पहल नगरेकै कारण चीनले समेत तातोपानी भन्सार नाका खुलाउन चासो नदिएको गुनासो गर्दै आएका छन्। करिव १५ सय कन्टेनर व्यवसायी विस्थापित हुने अवस्था आउँदा समेत सरकारले तातोपानी नाका खुलाउन पहल नगरेपछि प्रधानमन्त्रीलाई ज्ञापन पत्र बुझाउनु परेको संघका अध्यक्ष अर्जुनबहादुर सापकोटाले जानकारी दिए। उनले प्रधानमन्त्रीको चीन भ्रमणपछि सो नाका खुल्नेमा आफूहरु विश्वस्त रहेको प्रतिक्रिया दिए।

व्यवसायीहरुले तातोपानी भन्सार नाकालाई नेपाल चीन सम्बन्धको ऐतिहासिक आधार भएको उल्लेख गर्दै त्यसलाई खुलाउन कूटनीतिक पहल गर्न सरकारसँग अनुरोध समेत गरेका छन्। विनाशकारी भूकम्पका कारण तातोपानी भन्सार नाका बन्द भएयता रोजीरोटी समेत खोजिएको स्थानीयले पनि गुनासो गर्दै आएका छन्। तातोपानी भन्सार नाका नेपाल र चीन व्यापारको मूलद्वारा नै हो।