जिल्ला कोभिड संकट व्यवस्थापन केन्द्र (डीसीसीएमसी) कैलालीको मातहतमा रहने गरी धनगढी उपमहानगरपालिका र गोदावरी नगरपालिकाको सहकार्यमा २१ वैशाखदेखि निर्माणको काम सुरु भएको थियो। 

धनगढी उपमहानगरपालिका प्रमुख नृपबहादुर वडले गेटामा निमार्णाधीन आइसोलेसन सेन्टरको काम अन्तिम चरणमा पुगेको बताए। २ हजार क्षमताको आइसोलेन बनाउने तयारी भइरहेको कलेजमा सुरुमा ५ सय बेडको बनाईने भनिएको छ। अहिले ८० देखि ९० बेड तयारी अवस्थामा रहेको र बाँकी आवश्यकताका आधारमा बनाइने नगर प्रमुख वडले बताए।

उनले भने,‘सबै तयारी सकियो तर अक्सिजन नभएका कारण मात्रै सञ्चालनमा आउन सकेको छैन। हामीले काम र तयारी पूरै गरिसकेका छौँ। अक्सिजनको व्यवस्था हुन नसक्दा रोकिएका छौँ। यदि अक्सिजनको व्यवस्था भयो भने तत्काल आइसोलेसन सेन्टर सञ्चालनमा ल्याउन सकिन्छ।’

कैलालीमा रहेको सेती प्रादेशिक अस्पताललगायत अन्य निजी अस्पतालमा पनि अहिले अक्सिजनको अभाव भएको उनले बताए। वडले आफूहरु अक्सिजन व्यवस्थापनमा जुटेको र केही दिनमै व्यवस्था भएर आइसोलेसन सेन्टर सञ्चालनमा आउने दाबी गरे। 

आइसोलेसन सेन्टर निर्माणमा प्रदेश सरकार अग्रसर 

निर्माणाधीन आइसोलेसन सेन्टर निर्माणलाई चाडो बनाउन सुदूरपश्चिम प्रदेश सरकार अग्रसर देखिएको छ। संक्रमित संख्या अत्यधिक बढेपछि मेडिकल कलेजलाई आइसोलेसन बनाउने तयारी सुरु गरिएकामा प्रदेश सरकारले निर्माण कार्यमा सहयोग गरेका छ। 

सुदूरपश्चिम प्रदेश कोभिड संकट व्यवस्थापन केन्द्रको बैठकले गेटा मेडिकल कलेजका नवनिर्मित भवनमा आइसोलेसन सेन्टर निर्माणका लागि  ५० लाख उपलब्ध गराउने निर्णय गरेको छ। साथै २० जना स्वास्थ्यकर्मी परिचालन गर्ने समेत बताएको छ।

प्रदेशको सामाजिक विकास मन्त्रालयले आवश्यक जनशक्ति करारमा भर्ना गर्ने जनाएको छ।  मन्त्रालयले दुई जना विषेशज्ञ चिकित्सकसहित दुई जना मेडिकल अफिसर, पाँच जना स्टाफ नर्स, हेल्थ असिसटेन्ट,  अहेब, अनमी, ल्याब टेकिनिसियन दुई–दुई जना र तीन सरसफाइकर्मी गरी २० जनालाई खटाउने सामाजिक विकास मन्त्रालयका स्वास्थ्य शाखा प्रमुख डा. जगदीश जोशीले बताए। आइसोलेसन सेन्टरमा अक्सिजनको अभावबारे पहल भईरहेको उनको भनाइ छ।

ह्युमानिटी फाउण्डेसनले अक्सिजन प्लान्ट जडान गर्दै

पछिल्लो समय कोरोना संक्रमितले अक्सिजनको अभावका कारण अकालमै ज्यान गुमाउँदै छन्। अक्सिजनको अभाव खड्किएका बेला ह्युमानिटी फाउण्डेसन नेपालले धनगढीस्थित सेती प्रादेशिक अस्पतालमा अक्सिजन प्लान्ट जडान गर्ने भएको छ। अक्सिजन अभावमा नागरिकले ज्यान गुमाउन नपरोस भन्दै ह्युमानिटी फाउण्डेसन नेपालले सेती प्रादेशिक अस्पतालमा अक्सिजन प्लान्ट जडान गर्ने भएको हो।

फाउण्डेसनका महासचिव दीर्घराज उपाध्यायले भने, ‘प्रदेशमा नागरिक अक्सिजन नपाएर अकालमै ज्यान गुमाउन बाध्य छन्। उक्त समस्यालाई मध्यनजर हामीले निःशुल्क अक्सिजन अभियान सञ्चालन गर्दै आएका थियौं। लगत्तै दुई साताभित्र अक्सिजन प्लान्ट जडान गरिसक्ने लक्ष्य राखेका छौं।’ जनस्तरको सहयोगबाट ह्युमानिटी फाउण्डेसनले अक्सिजन प्लान्ट जडान गर्न लागेको हो। 

अक्सिजन प्लान्ट जडानका लागि विभिन्न व्यक्ति तथा संस्थाहरुले आर्थिक सहयोग गरिरहेको फाउण्डेसनका महासचिव उपाध्यायले बताए। अक्सिजन प्लान्ट जडान भएपछि बिरामीलाई राहत हुने अपेक्षा गरिएको छ।

मंगलबार अक्सिजन प्लान्ट जडान गर्नका लागि प्रदेशको सामाजिक विकास मन्त्रालय र ह्युमानिटी फाउण्डेसन नेपालबीच सहमति भएको छ। कोरोना भाइरसबाट संक्रमितको उपचारमा आवश्यक पर्ने अक्सिजन प्लान्ट मन्त्रालयको मातहतमा रहेको सेती प्रादेशिक अस्पतालमा निःशुल्क जडान गरिन लागेको फाउण्डेसनले जनाएको छ।

अक्सिजन कन्सन्ट्रेटर जडान, उपचारमा सहज

सेती प्रादेशिक अस्पतालले कोरोना संक्रमितको उपचारका लागि अक्सिजन कन्सन्ट्रेटर जडान गरेको छ। संघीय सरकारले खरिद गरेर पठाएका अस्पतालले २४ सहित ३३ वटा अक्सिजन कन्सन्ट्रेटर जडान गरेर सेवा दिन थालेको छ।

प्रादेशिक अस्पतालका सूचना अधिकारी दिलिपकुमार श्रेष्ठले संघीय सरकारबाट प्राप्त भएका २४, प्रदेश स्वास्थ्य आपूर्ति व्यवस्थापन केन्द्रले दिएका ६ र धनगढीका हार्डवेयर व्यवसायी सुरेन्द्र राँठीले हस्तान्तरण गरेका ३ वटा अक्सिजन कन्सन्ट्रेटरबाट संक्रमितलाई अक्सिजन दिन थालिएको जानकारी दिए।

अक्सिजन कन्सन्ट्रेटरले प्लान्टबाट सिलिन्डर भरेर संक्रमितको बेडसम्म पुगाउनुपर्ने झन्झटसमेत हटेको बताए। श्रेष्ठले अहिले प्लान्टबाट सोझै पाइप जोडेर अक्सिजन दिन थालिएको बताए। जसले संक्रमितको उपचारमा सहज भएको अस्पतालले जनाएको छ।

सेवा प्रभावकारी बनाउन बारअनुसार कार्यतालिका

सेती प्रादेशिक अस्पतालको सेवा थप चुस्त दुरुस्त तथा प्रभावकारी बनाउन बारअनुसार कार्यतालिका सार्वजनिक गरिएको छ। सेती प्रादेशिक अस्पताल व्यवस्थापन समितिले बिहीबार एक विज्ञप्ति जारी गर्दै अस्पतालको सेवा थप प्रभावकारी बनाउन तथा व्यवस्थापन बलियो बनाउन कार्यतालिका सार्वजनिक गरेको हो।

आइतबार कोभिड वार्डमा खटिएका चिकित्सक तथा नर्सिङ इञ्चार्जसँग देखिएका समस्याबारे छलफल तथा आइसियु र भेन्टिलेटरबारे रिपोर्टिङ गर्ने जारी विज्ञप्तिमा उल्लेख छ।

यस्तै औषधिको अवस्थाबारे फार्मेसी इञ्चार्जसँग रिपोर्टिङ लिने, प्रयोगशाला इञ्चार्जसँग स्वाब संकलन तथा छिटो छरितो रिपोर्ट प्रदान गर्नेलगायत विषयमा रिपोर्टिङ गर्ने जारी विज्ञप्तिमा उल्लेख छ।