संसदमा अविश्वासको प्रस्ताव पेश गर्दै प्रचण्डले कांग्रेस सभापति शेरबहादुर देउवा र आफूलाई प्रधानमन्त्रीले 'एक्सन लिन' भनेको दावी गरे।। 'सभामुख महोदय विषय प्रतिकात्मक जस्तो पनि छ र गम्भLर पनि छ', प्रचण्डले भने, 'कांग्रेसका सभापति शेरबहादुर देउवाजी र मलाई उहाँले भन्नुभयो या त तपाई एक्सन लिनुस् कि म एक्सन लिन्छु।'

माओवादी केन्द्रले एक्सन लिने भनेको समर्थन फिर्ता लिने र प्रधानमन्त्रीले एक्सन लिने भनेको मन्त्रीहरुलाई कारबाही गर्ने रहेको प्रचण्डले बताए। 'मैले सोचेँ प्रधानमन्त्रीले समर्थन फिर्ता लेओस् भन्ने चाहनुभयो', प्रचण्डले भने। भाषणबाट देश नचल्ने भन्दै प्रचण्डले प्रचण्डले मधेसी मोर्चाको माग सम्बोधन गर्ने विषय प्रधानमन्त्रीको प्राथमिकतामा कहिल्यै नपरेको आरोप लगाए।

'९ महिनापछि प्रधानमन्त्रीलाई याद भयो देश भाषणबाट मात्रै नचल्दो रहेछ। पानीजहाज, रेल, ग्यास… बोले जस्तो कार्यान्वयन गर्न सजिलो रहेनछ', प्रचण्डले भने, 'बरु सरकार गए पनि हुन्छ भन्ने उहाँले सोच्नुभयो कि? मलाई लाग्छ प्रधानमन्त्री थाकिसक्नुभयो।'

वाम गठबन्धन तोड्नु आफ्नो चाहना नभएको प्रचण्डले दावी गरे। 'प्रधानमन्त्रीले एमाले र माओवादी केन्द्रका नेताबीच जुन सहमति भएको थियो, त्यो सहमति कार्यान्वयन गर्न इच्छा देखाउनुभएन', उनले भने।