वैदेशिक रोजगारीमा जाने व्यक्तिलाई श्रम स्वीकृति जारी गर्ने गरेको वैदेशिक रोजगार विभाग, काठमाडौं कार्यालयका प्रमुख तेजराज पाण्डेले कतारमा समस्या सिर्जना भएयता श्रम स्वीकृति लिनेको संख्या ४० प्रतिशतले घटेको जानकारी दिए। ' कतारमा रहेको राजदूतावासका अधिकारीसँग कुराकानी हुँदा खासै समस्या छैन भन्ने खबर आउँछ' उनले भने ' तर श्रम स्वीकृति लिनेको संख्या घटिरहेको छ।' कतार जान दैनिक चारदेखि ६ सय युवायुवतीले श्रम स्वीकृति लिने गरेकोमा यतिखेर दैनिक दुई देखि तीनसयले श्रम स्वीकृति लिने गरेका छन्। मंगलबार २ सय ३७ जनाले अन्तिम श्रम स्वीकृति लिएको पाण्डेले जानकारी दिए।

संकट सिर्जना भएयता दुई हजारले अन्तिम स्वीकृति लिएर रोजगारीका लागि कतार पुगेका छन्। अघिल्लो आर्थिक वर्षको तुलनामा चालु आर्थिक वर्षको नौ महिनामा वैदेशिक रोजगारबाट प्राप्त हुने रेमिट्यान्स वृद्धिदर घटेको बेला कतारमा समस्या सिर्जनासँगै त्यता जानेको संख्या घट्न थालेपछि अर्थतन्त्र झनै प्रभावित हुने आशंका गर्न थालिएको छ। पछिल्ला वर्ष इन्धन बिक्री गरेर राम्रो आर्थिक र भौतिक प्रगति गरेको कतारलाई दुई साताअघि छिमेकी मुलुकहरुले एक्लो बनाउँदै वर्तमान सम्बन्ध तोड्ने निर्णय गरेका थिए।