तीन दिनअघि नै स्थानीयबासीले कालीगण्डकीमा शव देखेपछि प्रहरीमा खबर गरेका थिए। तर, उक्त शव सडेको अवस्थामा रहेको कारण सिधै पहिचान हुन नसक्दा तीन दिनसम्म बेबारिसे अवस्थामा प्रहरीले नदी किनारमा गाडेर राखेको थियो। बुधबार मात्र शवको शारीरिक संरचना सहितको फोटो बेपत्ता शिक्षकको परिवारमा देखाउँदा बेपत्ता पौडेलकी आमाले उक्त शव आफ्नै छोराको रहेको पुष्टी गरेकी हुन्।

शवलाई पोष्टमार्टम गर्नको लागि धौलागिरी अञ्चल अस्पताल बाग्लुङमा ल्याइएको छ। पर्वतका डीएसपी खनालले भने आमाले शव आफ्नै छोराको हो भनेको आधारमा नै पोष्टमार्टमको लागि अस्पताल लगेको जानकारी दिए। शव सडिसकेको अवस्थामा रहेको कारण उनको हत्या भएको हो वा आत्महत्या हो भन्ने बिषयमा पूर्वानुमान गर्न कठिन रहेको र डीएनए परीक्षणको लागि नमूना पठाउने उनको भनाइ छ।

२० वर्षीय पौडेल कुश्मा नगरपालिकाको कटुवाचौपारीमा रहेको आईबल एकेडेमीमा शिक्षकको नियुक्ति पाएको २२ दिनदेखि बेपत्ता बनेका थिए। विद्यार्थीलाई चरम यातना दिएपछि विद्यालय प्रशासनले अभिभावकसँग माफी माग्नुपर्ने भन्दै विद्यालयमा बोलाएपछि उनी सोही दिनबाट सम्पर्कविहीन भएका हुन्। शिक्षक पौडेलले विद्यालयको कक्षा परीक्षा लिने क्रममा उतीर्ण नभएको भन्दै ४ जना विद्यार्थीलाई चरम यातना दिएको विद्यालयले जनाएको छ। यातनाका कारण विद्यार्थीहरु बेहोस हुनुका साथै घाइते भएका छन्।