तर  अहिले उनीहरू एकअर्काविरुद्ध चुनावी मैदानमा छन्। गोरखा–२ चुनावी प्रतिस्पर्धामा रहेका भट्टराई आफ्नै पार्टी नयाँशक्तिको चुनाव चिह्न आँखा लिएर मैदानमा छन् भने श्रेष्ठ माअोवादी केन्द्रको चुनाव चिह्न गोलाकारभित्रको हँसिया हथौडाबाट चुनाव लड्दै छन्। भट्टराईलाई कांग्रेको र श्रेष्ठलाई एमालेको साथ छ।

भट्टराई र श्रेष्ठमात्र होइन कुनै बेला सहकर्मी रहेका र अहिले चुनावमा एक अर्काविरुद्ध उठेका अरु पनि छन्। १८ दिन अगाडिसम्म राजपाको एउटै कमिटीमा रहेका महेन्द्र राय यादव र जंगीलाल राय आसन्न प्रतिनिधिसभा निर्वाचनमा प्रतिस्पर्धामा उत्रिएका छन्। महेन्द्र राजपा अध्यक्षमण्डलका नेता हुन् भने जंगीलाल महासचिव।

अहिले महेन्द्र राजपाबाटै सर्लाही–२ मा उम्मेदवार छन् भने जंगीलाल कांग्रेसबाट चुनाव लड्दैछन्। ‘हामी दुईबीचको सम्बन्ध राजनीतिक मात्रै हो, व्यक्तिगत होइन,’ बिहीबार सर्लाहीको हरिपूर्वा नगरपालिका–३ पुगेका जंगीलालले अन्नपूर्णसँग टेलिफोनमा भने, ‘राजनीतिमा योसँग चुनाव लड्ने, योसँग नलड्ने भन्ने हुँदैन। जो अगाडि आउँछ, उसैसँग प्रतिस्पर्धा हुन्छ। अहिले महेन्द्रजीसँग हुँदै छ।’

जंगीलालले कात्तिक ६ गते कांग्रेस प्रवेश गरेर टिकट लिएका हुन्। हुन त यी दुई नेता सात महिना मात्रै (वैशाखयता मात्रै) एउटै पार्टीमा रहे। त्यसअगाडि महेन्द्र तराई मधेस सद्भावना पार्टीका अध्यक्ष थिए भने जंगीलाल महन्थ ठाकुर नेतृत्वको तराई मधेस लोकतान्त्रिक पार्टीका महामन्त्री।

०७० को दोस्रो संविधानसभा निर्वाचनमा महेन्द्र सर्लाही–४ बाट र जंगीलाल ५ बाट निर्वाचित भएका थिए। क्षेत्र निर्धारण गर्दा सर्लाहीमा चारवटा मात्रै निर्वाचन क्षेत्र भएपछि यी दुई नेता एकै ठाउँबाट प्रतिस्पर्धामा उत्रेका हुन्।
 
मोहनसिंह राठौर र झपटबहादुर रावल कैलाली २ बाट प्रतिनिधिसभा निर्वाचनमा प्रतिस्पर्धा गर्दै छन्। राठौर कांग्रेसको रुख चिह्नमा र रावल एमालेको सूर्य चिह्न लिएर मैदानमा छन्। यी दुई नेता उम्मेदवारी मनोनयन (कात्तिक १६) को दुई दिन अघिसम्म एउटै पार्टी एमालेमा थिए।

०५६ र ०७० को निर्वाचनमा एमालेबाट कैलाली–२ मा जितेका राठौरलाई यसपटक पार्टीले टिकट नदिने निर्णय गरेपछि कांग्रेस प्रवेश गरेर उम्मेदवार बनेका हुन्। ०७० सालको दोस्रो संविधानसभा निर्वाचनमा कैलालीका ६ वटा निर्वाचन क्षेत्रमध्ये कैलाली २ मा मात्रै एमालेले जितेको थियो।

‘राजनीतिमा योसँग चुनाव लड्ने, योसँग नलड्ने भन्ने हुँदैन। जो अगाडि आउँछ, उसैसँग प्रतिस्पर्धा हुन्छ।’ जंगीलाल राय, कांग्रेस उम्मेदवार, सर्लाही(२
अझ रोचक पक्ष त राठौर र रावलबीच २०६३ सालमा मन्त्री र पिएको सम्बन्ध थियो। राठौर ०६२\०६३ को आन्दोलनपछि अन्तरिमकालको मन्त्रिपरिषद्का शिक्षा राज्यमन्त्री थिए भने झपट उनका पिए। झपट भीम रावल उपप्रधान तथा गृहमन्त्री हुँदासमेत पीए नै थिए।

सल्यान र सप्तरीमा पनि माओवादी र राजपाका नेताहरूले आफ्नै विगतका सहकर्मीसँग प्रतिस्पर्धा गर्दै छन्। सल्यानमा विनाविभागीय मन्त्रीसमेत रहेका माओवादी नेता टेकबहादुर बस्नेतसँग स्वतन्त्रबाट आफ्नै सहकर्मी उमाकान्त शर्मा तथा सप्तरीको २ को प्रदेशसभा २ मा राजपा महामन्त्री मनीष सुमनसँग क्षेत्रीय सभापति लक्ष्मण यादव स्वतन्त्रबाट चुनावी प्रतिस्पर्धा गर्दै छन्।