पेटको रोगको समस्या भएकी लिखु तामाकोसी गाउँपालिका–१ दुरागाउँकी २६ वर्षीय सरिता दर्जीलाई बोक्सीले दुःख दिएको भन्दै ती युवाले बोक्सी भगाइदिन्छु भनी तातो फलामले डामेको पीडितको परिवारले बताएको छ।

बोक्सी निकालेर फालिदिन्छु भन्दै महिलाको गालामा तातो फमामले डाम्ने ओखलढुङ्गा जिल्ला लिखु गाउँपालिका–२ रगनीका ३५ वर्षिय रविन्द्र नेवारलाई प्रहरीले  पक्राउ गरेको हो।

सरिताको पारिवारिक स्रोतका अनुसार केही महिनादेखि पेटको रोगबाट ग्रसित सरिताको गाउँमा उपचार गर्दा ठीक नभएपछि थप उपचारको लागि काठमाडौं लगिएको थियो। उपचारको लागि काठमाडौं पुगेकी सरिता बास बस्न आफ्नै नन्देभाइ रविन्द्रको कोठामा पुगेकी थिइन्।

आफ्ना स्वास्थ्य अवस्थाबारे नन्देभाइलाई सुनाएपछि बोक्सी लागेको हुनसक्ने भन्दै सरितालाई अस्पताल नै नपठाई उनले गाउँमै लिएर आएका थिए। गत जेठ २४ गते घरमै धामी बस्दा सरितालाई कुनै रोग शरीरमा नभएको तर वोक्सीले दुःख दिएकाले शरीरबाट बोक्सी भगाइदिने भन्दै सिस्नो पानीले हान्ने र तातो फलामले दाहिने गालामा डामेपछि सरिता बेहोस भएकी थिइन्।

बिरामी बेहोस भएपछि धामी रविन्द्र फरार थिए। बोक्सी भगाउने भन्दै सिस्नो पानी र तातो फलामले डामेपछि सहन नसकेर असह्य भएकी सरिताले धामी बसेर रोग ठिक पारिदिने भन्दै आफूलाई थप पीडा दिएको भन्दै जिला प्रहरी कार्यालयमा बोक्सी ऐन २०७२ अनुसार उजुरी दर्ता गराएकी थिइन्।

उजुरीको आधारमा जिल्ला प्रहरी कार्यालय रामेछापबाट प्रहरी खटिई धामी रविन्द्रलाई काठमाडौंबाट पक्राउ गएिको जिल्ला प्रहरी कार्यालय रामेछापका प्रहरी निरीक्षक राजेन्द्रकुमार थापाले बताए।