नगरसभाबाट पारित महानगरपालिकाको नीति तथा कार्यक्रम र बजेटमा चालू आर्थिक वर्षमा पूँजीगत तर्फ ९८ लाख र चालूतर्फ ४९ लाख २० हजार रुपैयाँ विभिन्न शीर्षकमा रकमान्तर गरिएको पनि उल्लेख गरिएको छ। महानगरपालिकाले चालू आर्थिक वर्षको चैतभन्दा अगाडि असुल गरेको घर बहाल कर तत्काल फिर्ता गर्न पनि नेपाल सरकारसँग माग गरेको छ। स्थानीय कर नेपाल सरकारले लिन नपाउने व्यवस्थाअनुसार चैत अगाडि असुल गरिएको घर बहाल कर तत्काल उपलब्ध गराउन सरकारसँग माग गरिएको महानगरपालिकाका प्रमुख महर्जनले जानकारी दिए। 

महानगरपालिकाले वडालाई विकासको केन्द्रविन्दु बनाउने अभियान पनि संचालन गर्ने योजना अघि सारेको छ। महानगरपालिकाको बजेट, नीति तथा कार्यक्रममा ‘एक घर एक उद्यम’को अवधारणा पनि अघि सारिएको छ। त्यसैगरी महानगरपालिका क्षेत्रभित्रका भूकम्प प्रभावित लाभग्राहीको नाम सूचीमा समावेश भएका व्यक्तिलाई तीन हजार वर्ग फुटसम्म क्षेत्रफलको नक्सा पास दस्तुर मिनाह गरिएको पनि प्रमुख महर्जनले बताए। उनले मापदण्डविपरीत निर्माण भएका भवनहरूलाई पनि करको दायरामा ल्याउने योजना अघि सारिएको बताए।

महानगरपालिकाले खानेपानी व्यवस्थापनका लागि पानी बोरिङको वैज्ञानिक अध्ययन गर्ने निर्णय पनि गरेको छ।