पुराणहरूमा यो दिनको महत्त्वबारे उल्लेख पाइन्छ। संस्कृतमा षड् भनेको छ र तिला भनेको तिल अर्थात् तिललाई छ प्रकारले प्रयोग गर्ने दिन। तिल प्रयोग गरी नुहाउने, तिलको तेलको मालिस गर्ने, तिलले होम गरी तिलक लगाउने, तिल मिसिएको जल पिउने, तिलले बनेका खानेकुरा खाने र तिल दान गर्ने विधान रहेको पुराणविद् पं.बालमुकुन्द देवकोटाले जानकारी दिए।

एकादशी विशेषगरी वैष्णवहरूको विशेष पर्व हो। भगवान् विष्णुको पूजा आराधना गर्ने व्रत बस्ने दिनको रूपमा यो दिनको महत्त्व छ। 

षट्तिला एकादशीका दिन गन्ध, पुष्प, धूप, दीपसहित षोड्षोपचार विधिले विष्णुको पूजा गर्ने र मास र तिलमिश्रित खिचडी पकाएर भगवानलाई भोग लगाउने विधान रहेको पं. देवकोटाले बताए।

माघलाई त्यसै पनि पवित्र महिना मानिएको छ। माघमा प्रशस्त तिलको प्रयोग गर्नुपर्ने पुराणमा बताइएको छ। सनातन धर्ममा तिल देवता र पितृका प्रिय वस्तु त मानिन्छ नै मानिसका लागि पनि पुष्टिकारक मानिएको छ।