महिला, कानुन र विकास मञ्चले कला परिषद्को हल बबरमहलमा फोटो प्रदर्शनीको आयोजना गरेका हुन्। कोख मेरो, सन्तान कसको ? शीर्षक दिइएको फोटोप्रदर्शनीमा नागरिकता विहीन व्यक्तिहरूसँग सम्बन्धित फोटो प्रदर्शनी सुरु भएको हो।

त्यस क्रममा प्रदर्शनीको साथमा भक्तपुरमा घटेको वास्तविक घटनालाई उजागर गरिएको नाटक समेत प्रदर्शन गरिएको थियो। २०७१ साल श्रावणमा भक्तपुरमा घटेको घटनालाई नाटकको रूपमा उजागर गर्दै देशमा सङ्घीयता आए पनि न्यायिक स्वतन्त्रता नभएको उजागर गरिएको थियो। नाटकमा वैदेशिक रोजगारीका कारण आफूले आफ्नो श्रीमानबाट जीवनभरको लागि टाढा हुँदाको पल, त्यसमा पनि आफ्नो छोराले बुवाको अनुपस्थिति तथा जन्म दर्ता नहुँदा नागरिकता नपाएको पिडालाई प्रस्तुत गरिएको थियो।

वर्तमान संविधानले आमाको नामबाट पनि सन्तानले नागरिकता पाउने प्रावधान गरेता पनि त्यो हाल कार्यान्वयन भएको छैन। नाटकको प्रस्तुतिमा कानुनी अधिकारको माग गर्दा जनप्रतिनिधिले नागरिकताको लागि सिफारिस नदिने र प्रशासनद्वारा नागरिकता वितरण नगर्ने गरेको दुःखेसोमूलक तथा सन्देशमूलक प्रस्तुति रहेको थियो।

नाटकमा एउटा छोरी मान्छेले एक्लो हुँदा आफ्नो परिवार, आफन्त तथा समाजमा हुने गरेको अपहेलनालाई जस्ताको तस्तै प्रस्तुत गरिएको थियो। एउटा नारीले पुरुषकै कारण सहनुपरेको पिडा त उनको लागि मात्र भयो। तर उनीबाट जन्म लिएको त्यो अवोध बालकले समेत नागरिकताबाट बञ्चित भई राज्यबाट पाउने कुनै पनि सेवा सुविधाबाट बञ्चित हुनुपरेको बास्तविक घटनालाई नाटकको माध्यमबाट उजागर गरिएको छ।

देशमा भएका तथा पिडित महिलाहरुको भनाइलाई समेटेको बास्तविक तथा यथार्थपरक  फोटो प्रदर्शनी गरिएको छ। फोटो प्रदर्शनी चार दिनसम्म चल्नेछ।