किचकबध ऐतिहासिक, धार्मिक तथा पर्यटकीयस्थल संरक्षण समितिले मेलामा आउने भक्तजनको सवारीसाधनलाई व्यवस्थित गर्न पार्किङ ठेक्का लगाएको थियो। समितिले पार्किङको ठेक्का त्यहाँका स्थानीय युवालाई दिएको बुझिएको छ। समितिले यसबर्ष चारपांग्रेबाट २५० देखि ३००, तीन पांग्रे (अटोरिक्सा र सिटी सफारी) बाट २००, मोटरसाइकलबाट १०० र साइकलबाट २० रुपैयाँ रकम तोकेको थियो। समितिले तोकेको रकम अनुसार नै युवाले धम्कीपूर्ण भाषामा सवारी साधनबाट रकम असुल्न थालेपछि भक्तजन आक्रोसित भएका थिए। गत वर्ष मोटरसाइकलको पार्किङ शुल्क ५० र तीन पांग्रेको शुल्क १०० तोकेको थियो। 

यसवर्ष सो शुल्कमा सय प्रतिशत वृद्धि गरेपछि समितिले पार्किङको नाममा ब्रम्हलुट मचाएको भक्तजन राम राजवंशीले गुनासो पोखे। ‘किचकवध मेलामा भक्तजन लिएर गएका थियौ’, सिटी सफारी चालक दुर्गेस माझीले भने, ‘३०० को भाडा लिएर गएकोमा २०० पार्किङ शुल्क मागेपछि आफू आश्चर्य परे।’ 

२०० पार्किङ शुल्क दिन सक्दैनौ भनेपछि पार्किङमा रहेका युवासँग केही बेर विवाद भएको उनले सुनाए। भद्रपुरबाट ५० रुपैयाँमा अटो वा रिक्सामै मेलास्थल जान सकिन्छ, अभिषेक प्रधानले भने, 'मोटरसाइकलमा गएर उल्टै घाटा भयो। तेल पनि डढियो र १०० पनि तिर्नु पर्‍याे। बरु अटोमै जाँदा राम्रो हुन्थ्यो।' धार्मिक मेलामा समितिले मनपरी शुल्क तोक्नु नियमसंगत र व्यवहारिक नभएको उनको गुनासो छ। ‘५० रुपैयाँ लिनुसम्म ठिक हो। आउँदो वर्ष यसलाई सच्याउनुपर्छ', उनले थपे।

यता किचकबध ऐतिहासिक, धार्मिक तथा पर्यटकीयस्थल संरक्षण समिति सचिव मदन कँडेलका अनुसार समितिको निर्णय बमोजिम नै पार्किङमा शुल्क वृद्धि गरेको हो।