काठमाडौं : कोशी, बागमती र गण्डकी प्रदेशका पहाडी भूभागका थोरै स्थानमा अहिले सामान्य वर्षा भइरहेको छ। मौसम पूर्वानुमान महाशाखाका अनु...
ताप्लेजुङ : कुनै बेला रमेशका लागि आन्दोलन नै सबै थोक थियो। आन्दोलनको एक अथक योद्धा, शासकको आँखाको कसिङ्गर बनेका ती रमेश राई ‘रसिक’ ले देखेको सपना अहिलेको जस्तो थिएन। देशमा शान्ति सुरक्षा र जनवादी पुँजीवादी क्रान्तिको माध्यमबाट स्वतन्त्रता र मुक्ति मिल्ने आशामा युद्धमा होमीएका उनी, जति चाहेको हो त्यति परिवर्तन नभएको महसुश गर्छन्।
ताप्लेजुङको पूर्वी क्षेत्र पाथिभरा याङ्वरक गाउँपालिका वडा नं ४ मा जन्मिएका रमेशलाई धेरै मान्छेको हुलमा बस्न पनि मन पर्दैनथ्यो। तर, परिस्थितिले लोकतान्त्रिक गणतन्त्रिक बाटोको हरियो बत्ती बाल्न युद्धमा उत्रिन बाध्य पार्यो उनलाई।
रमेश जस्तै नेपाल आमाका योद्धा छोराछोरीका भरमा देशमा धेरै परिवर्तन भयो। लोकतन्त्र, गणतन्त्र, संघीयता जस्ता उपलव्धिहरु हासिल भए। तर ती योद्धाहरु कहाँ छन्? तिनकै आडमा सत्तामा पुगेकाहरुले भुलेको गुनासो उनीहरुको छ।
रमेशले अहिले जिल्ला सदरमुकाम छैवैमा च्याउ फर्म खोलेका छन्। करिब ५ वर्ष भयो च्याउ खेती सुरु गरेको। 'अहिले जग्गा भाडामा लिएर च्याउ खेती गरिरहेको छु' राई भन्छन्, 'द्वन्द्वका बेला धेरै रगत र पसिना बगे तर त्यो अनुसारको उपलव्धि भएन।'
रमेश जस्तै २०५० को दशकमा माओवादीले सुरु गरेको सशस्त्र युद्धमा धेरै युवाहरू होमिए। परिवर्तनका लागि भन्दै धेरै त कलिलै उमेरमा बन्दुक बोक्न तयार भए। शासक वर्गको अत्याचार अन्त्य गर्नका लागि धेरैले आफ्नो बलिदानी पनि दिए। 'अहिलेसम्म युद्ध लडेकामध्ये नेतृत्व तहमा रहेका धेरै माथि पुगेका छन्। युद्धलाई सफल पार्न लागेका कार्यकर्ताको अवस्था भने ज्यूँका त्यूँ छ' राईले भने।
'जनयुद्ध'मा घाइते भएका केही कार्यकर्ताको अवस्था त झनै दर्दनाक छ। ०५८/५९ साल तिर फर्कंदै उनी भन्छन्, 'त्यतिवेला सुरुवातमा त जिल्ला सदरमुकाम आउँदा जाँदा होस् या गाउँकै ठुलावडा भनौँदाहरुले दुःख दिन्थे। त्यसकै प्रतिकारका लागि पनि युद्धमा होमियौँ।' पार्टीले उनलाई त्यतिवेला कामाण्डरको पनि जिम्मेवारी दिएको थियो।
कमाण्डरको भूमिकामा लडाइँ गर्दा गर्दै कयौँ त्यस्ता क्षण आए त्यतिबेला बाँच्छु भन्ने लागेको थिएन। 'धेरै ठाउँमा बाँच्छु भन्ने आशा त कत्ति पनि थिएन। तर बाँच्न सफल भइयो' उनी भन्छन् 'हिँडेको नै कि बाँचेर देशको परिवर्तन गर्छु कि मरे पनि देशकै लागि मर्छु भनेर थियो।' देशकै लागि भनेर लडेका कयौँ युवालाई सरकारले भने कुनैपनि सहयोग नगरको उनीहरुको बुझाइ छ।
गरिखान सरल ब्याजमा ऋण देऊ
'हामीलाई कुनै ठूलो मानपदवीको आवश्यकता पर्दैन। हामीले देशका लागि लड्यौँ। परिवर्तन पनि भयो तर अव केहि व्यावसाय सुरु गर्नुपर्यो भने सरल व्याजमा ऋण र अनुदान सम्म दिनुपर्यो' राईले भने। 'जनयुद्ध'का योद्धाहरुलाई सरकारले सरल ऋणको व्यवस्था गरे विदेश पलायन हुनुपर्ने अवस्था नआउने उनी बताउँछन्।
तपाईको प्रतिक्रिया दिनुहोस्
यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।