दुई बिघा क्षेत्रफलमा लगाइएको सबै तरकारी सनवोरा नदीले बगाएर क्षति गरेको चौधरीले बताए। ‘लकडाउनले तरकारी बिक्री गर्न नपाएर लागत खर्चनै उठाउन पाएका थिएनौं,’ उनले भने, ‘बाढीले सबै तरकारी बगायो।’

यस्तै, चेतराज चौधरीको स्याली नदीमा बगर लगाइएको एक बिघा क्षेत्रफलको तरकारी बाढीले बगाएको छ। ‘खेतीको लागत खर्च ५० हजार रुपैयाँ लागेको छ,’ उनले भने, ‘दुई लाखभन्दा बढी आम्दानी हुन्थ्यो, सबै बाढीले बगायो।’

गीत चौधरीले बगरमा लगाइएको तरभुजा पनि बाढीले बगाएको छ। ‘भर्खरै पाक्न शुरु गरेको थियो। गाँउमै खपत बढी हुन्थ्यो,’ गीताले भनिन्, ‘त्यसबाट आम्दानी गरी घर खर्च चलाउने सोच थियो, सबै बाढीमा बग्यो।’

सनवोरा खोलाको बगरमा ६० भन्दा बढी परिवारले बगर खेती गरेका छन्। बगरमा लगाइएको खेती सबै बाढीले बगाएको वडा अध्यक्ष नरेन्द्रप्रसाद चौधरीले बताए। यस्तै, स्याली खोलाको बगरमा ४० भन्दा बढी परिवारले लगाएका तरकारी पनि बगाएको छ। उनीहरुको लाखौंको क्षति भएको र तथ्याङ्क संकलनको कार्य भैरहेको चौधरीले बताए।

यसैगरी, लालझाडी गाँउपालिका र कृष्णपुर नगरपालिकाका किसानले दोदा खोलाको बगरमा लगाएका तरकारी खेतीमा पनि बाढीले क्षति गरेको छ। दोदाको बगरमा १४० भन्दा बढी किसानले तरकारी खेती गरेका छन्।

एक्कासी नदीमा बाढी आउदा निकै क्षति पुगेको लालझाडी गाउँपालिका–६ का अध्यक्ष टिकाराम चौधरीले बताए।