तीन दशकदेखि ऊर्जा क्षेत्रमा सक्रिय बेनीका बेनी बैंकरोडका दुर्गाबहादुर श्रेष्ठले तीन दिनको अथक मिहेनतपछि १० वटा बल्ब बाल्न मिल्ने विद्युत् उत्पादन गरेका छन्। श्रेष्ठ म्याग्दी ऊर्जा प्रविधि सेवा केन्द्रका सञ्चालकसमेत हुन्।

चार वर्षअघि आफ्नै सीप र प्रविधिको उपयोग गरी कालिगण्डकी नदीबाट टर्बाइनमार्फत दुई सय किलोवाट विद्युत् उत्पादन गरेका छन्। बेनी बजारमा अहिले उनको चर्चा चुलिएको छ।

लकडाउनका समयमा फुर्सद भएकाले नयाँ प्रविधि सिकौं भनेर प्रयास गरेको उनले बताए। आफूसँग भएको सीप र सामग्रीको सदुपयोग गरेर बिजुली निकालेको श्रेष्ठले भनाइ छ। 

उनले बेनीमा कोरोना भाइरसको संक्रमणबाट जोगिन विभिन्न संघसंस्थाले बनाउन लागेको स्यानिटाइजर टनेल निर्माणमा समेत सहयोग गरेका छन्। ‘सधैं हावा लागिरहने ठाउँ हो, परीक्षणको रुपमा प्रयास गरेको थिएँ, सफल भएँ’, श्रेष्ठले भने। उनले थप प्रविधिको प्रयोग गरी क्षमता बढाएर बेनी बजारको एउटा क्षेत्रलाई नै पुग्ने गरी विद्युत् निकाल्न सकिने बताए।

पर्यटकीयस्थल लभ्लीहिलमा जडान गर्ने सोच भएको उनकोे भनाइ छ। हावा धेरै चल्ने स्थानमा उपयुक्त हुने भएकाले लभ्लीहिलमा लगेर जडान गर्ने उनले बताए।
साँझको समयमा लभ्लीहिलमा हावाबाट निकालेको बिजुलीले झिलीमिली पार्ने योजना उनले बनाएका छन्। साथै लभ्लीहिलमा मोबाइल चार्ज स्टेसन बनाउने उनको योजना छ। 

करिब ३ दशकदेखि ऊर्जाको क्षेत्रमा सक्रिय श्रेष्ठले म्याग्दीका विभिन्न लघुजलविद्युत्सहित जिल्ला बाहिरका परियोजनामा समेत आफ्नो सीपको प्रयोग गरेका छन्।