जेठ २० गते मृत्यु भएका डोल्पाको जगदुल्ला गाउँपालिका ३ थापागाउँका ५३ वर्षीय पुरुषमा कोरोना संक्रमण पुष्टि भएको हो।

मृत्यु भएकै दिन स्वाब संकलन गरी परीक्षणका लागि कर्णाली स्वास्थ्य विज्ञान प्रतिष्ठान जुम्ला पठाइएकोमा आज विहान आएको रिपोर्टमा कोरोना पोजेटिभ देखिएको गाउँपालिकाका अध्यक्ष नरासिं रोकायले जानकारी दिए।

दमको रोगी रहेका उनी सुर्खेत बसेर उपचार गराइरहेका थिए। जेठ १८ गते गाउँ फर्किएपछि उनलाई होम क्वारेन्टाइनमै राखिएको थियो। स्वास्थ्य थप जटिल बनेपछि जेठ २० गते उनको घरमै मृत्यु भएको थियो। उनको त्यही दिन स्वाब संकलन गरी दाहसंस्कार गरिएको गाउँपालिका अध्यक्ष रोकायाले बताए।

योसँगै नेपालमा कोरोनाका कारण मृत्यु हुनेको संख्या १२ पुगेको छ। स्वास्थ्य तथा जनसंख्या मन्त्रालयले यसबारे औपचारिक पुष्टि गर्न बाँकी छ।

यसअघि जेठ २० गते पाल्पाको मिसन अस्पतालमा पूर्वखोला गाउँपालिका घर भई भारतबाट आएका ४५ वर्षीय पुरुषको ज्यान गएको थियो। उनको ज्यान गएपछि मात्रै कोरोना संक्रमित रहेको पुष्टि भएको थियो।