मन्त्रालयले स्वाब परीक्षणपछि नेगेटिभ आउनेको विवरण नपठाउँदा क्वारेनटाइन व्यवस्थापनमा समस्या भइरहेको स्वास्थ्य कार्यालय सल्यानले जनाएको छ। पोजेटिभको मात्र विवरण पठाउँदा क्वारेनटाइनमा बसिरहेकालाई थप सास्ती भएको र पालिकाहरुलाई पनि थप सकस भइरहेको स्वास्थ्य कार्यालय सल्यानका प्रमुख डा. अर्जुन बुढाले बताए। 

जसका कारण क्वारेनटाइनमा कोचाकोच गरी मानिस राख्नुपर्ने बाध्यता भएको बनगाड कुपिण्डे नगरपालिकाका मेयर गोविन्द कुमार पुनले बताए। उनले भने, ‘परीक्षण भएका र नभएका एकै ठाउँमा राख्दा झनै जोखिम बढेको छ।’ 

स्वास्थ्य महाशाखाले पोजेटिभसँगै नेगेटिभको पनि विवरण उपलब्ध गराए १४ दिन पूरा गरेका नागरिकलाई होम क्वारेनटाइनमा पठाउन सहज हुने त्रिवेणी गाउँपालिका अध्यक्ष मान बहादुर डाँगीले बताए। 

उनले भने, ‘स्वाब संकलन भएको एक हप्तामा पनि रिपाेर्ट नआउने, रिपाेर्टमा पोजेटिभ तथा नेगेटिभबारे विवरण नपठाउँदा जोखिम झनै बढेको छ।’

दुई हजार बढीको स्वाब रिपाेर्ट आउन बाँकी 

सल्यानमा शुक्रबारसम्म दुई हजार तीन सय २७ जनाको स्वाब संकलन गरिएको छ। जसमा दुई हजारको रिपाेर्ट आउन बाँकी रहेको स्वास्थ्य कार्यालय सल्यानले जनाएको छ। हालसम्म बनगाड कुपिण्डेमा ४२ जना, दार्मा गाउँपालिकामा ९, कुमाख गाउँपालिकामा २ र कपुरकोट गाउँपालिकामा १ गरी ५४ जनामा कोरोना पोजेटिभ देखिएको छ। 

कोरोना पाजेटिभ देखिएका १३ जनाको सुर्खेत प्रदेश अस्पतालमा,  १२ जनाको सल्यान अस्पतालमा र बाँकी २९  जना सल्यान बहुमुखी क्याम्पसको आइसोलेसनमा छन्।