कथावाचक वाचन प्रवीण दीनबन्धु पोखरेलले कथा भनिरहँदा कलाकारहरु मञ्चमा अभिनय पनि गरिरहेका हुन्छन्। कहिले भक्तले भगवानको चरणमा परेर वरदान मागिरहेको त कहिले देवताले दैत्यलाई नाश गरेको। यी दृश्य पुराणको कथावाचनसँगै मञ्चमा मञ्चन पनि भइरहेको छ। पुराण वाचनका क्रममा बाँसुरी, मादल आदि बाजा बजाएर महायज्ञलाई संगीतमय बनाइएको छ। बेलाबेलामा भजन कीर्तन त हुने भइहाले।

महायज्ञमा बिभिन्न क्षेत्रका व्यक्तित्व र दानवीरहरु पनि सहभागी भएका छन्। आइतबार महायज्ञमा भूमिसुधार तथा व्यवस्था मन्त्री रामकुमार सुब्बा, राप्रपाका निवर्तमान अध्यक्ष पशुपतिशम्शेर जबरा, भारतका लागि पूर्व नेपाली राजदूत दीपकुमार उपाध्याय लगायतका नेताहरु पुगेका थिए।

महायज्ञमा बोल्दै भूमिसुधार मन्त्री रामकुमार सुब्बाले आफुहरु नेपाललाई हिन्दु राज्य बनाउन अझै संघर्षमा रहेको बताए। 'विश्वमा हिन्दु राज्यको प्रतिनिधित्व गर्ने देश नेपाललाई बनाउनुपर्छ भनेर हामी संघर्ष गरिरहेका छौं' उनले भने 'आज सदनमा नीति तथा कार्यक्रममाथि मतविभाजन भइरहेको छ तर मेरो लागि यो कार्यक्रम महत्वपूर्ण छ।' उनले अहिले हिन्दु धर्मप्रति अनेक चुनौती खडा भएको भन्दै यस्तै अवस्था रहेमा आगामी दिनमा यस्ता धार्मिक अनुष्ठानमा भक्तजनहरुकै अभाव हुन सक्ने बताए।

बाल सारथीले असहाय, विपन्न र सडक बालबालिकाको शिक्षा, स्वास्थ्य, खाना र आवासका लागि महायज्ञ आयोजना गरेको हो। महायज्ञ असार ७ गतेसम्म चल्नेछ।