काठमाडौं : शुक्रबार फाल्गुण कृष्ण चतुर्दशी अर्थात् महाशिवरात्रि। हिन्दु धर्मावलम्बी श्रद्धालुहरूले श्रद्धा र भक्तिपूर्वक भगवान् शिवको पूजा–आराधना गर्दैछन्।
महाशिवरात्रिको दिन बिहानै नदी वा पवित्रस्थलमा स्नान गरी श्रद्धापूर्वक भगवान् शिवको पूजा–आराधना गर्ने परम्परा रहेको छ।
पुराणहरूमा भगवान् शिवलाई भक्तहरूको कल्याण गर्ने र चाँडै प्रसन्न हुने देवताका रूपमा चिनाइएको छ। यस्तै संहारका देवताका रूपमा पनि शिवको महिमा छ। भगवान् शिवलाई पञ्चामृतले स्नान गरी चन्दन, सेता फूल, बेलपत्र आदिले पूजा गर्ने विधान छ।
महाशिवरात्रिको अवसरमा काठमाडौंको पशुपतिनाथ, ललितपुरको कुम्भेश्वर, भक्तपुरको डोलेश्वर, सिन्धुलीको कुशेश्वर र सिन्धुपाल्चोकको फटकेश्वरलगायत देशभरका शिवालयमा दर्शनार्थीको घुइँचो लागेको छ। पशुपतिनाथको दर्शन गर्न मुलुकका विभिन्न भागका साथै छिमेकी राष्ट्र भारतबाट समेत उल्लेख्य संख्यामा श्रद्धालु काठमाडौं आएका छन्।
भारतबाट आएका साधुसन्त तथा जोगीहरूका लागि पशुपति क्षेत्र विकास कोषले भोजन तथा बासको व्यवस्था मिलाएको छ। कोषले उनीहरूलाई दक्षिणा भेटीसहित विदाइ गर्ने गरेको छ।
नेपालका साथै भारतमा समेत धुमधामसँग यो पर्व मनाइन्छ। भारतमा द्वादश ज्योतिर्लिङ्गका साथै साना ठूला शिव मन्दिरमा मेला लाग्ने गर्दछ।
महाशिवरात्रिकै अवसर पारेर नेपाली सेनाले शुक्रबार सेना दिवस मनाउँदैछ।
तपाईंको ईमेल गोप्य राखिनेछ ।