सम्बन्धित मन्त्रालयबाट प्रस्ताव आएपछि निर्णय

|

काठमाडौं : कोभिड-१९ सम्बन्धी उच्चस्तरीय (सिसिएमसी) निर्देशक समितिले निषेधाज्ञापछि सेवा सञ्‍चालन गर्न बाँकी रहेका क्षेत्रहरु खोल्ने सम्बन्धमा सम्बन्धित मन्त्रालयबाट प्रस्ताव आएपछि निर्णय गर्ने भएको छ। 

मंगलबार सिंहदरबारमा बसेको सिसिएमसी निर्देशक समितिको बैठकले कोभिड-१९ का कारण रोकिएका बाँकी सेवाहरु सूचारु गर्ने सम्बन्धमा अध्ययन गरी सम्बन्धित मन्त्रालयबाट प्रस्ताव आएपछि निष्कर्षमा पुग्‍ने निर्णय गरेको छ। 

बैठकका निर्णयहरु सुनाउँदै प्रधानमन्त्री तथा मन्त्रिपरिषद्को कार्यालयका सचिव महेन्द्रप्रसाद गुरागाईंले खोल्न बाँकी रहेका क्षेत्रहरु सूचारु गर्ने सम्बन्धमा अध्ययन गरी प्रस्ताव ल्याउने सम्बन्धमा निर्णय भएको बताए। 

‘खोल्न बाँकी रहेका सेवाहरु सम्बन्धित मन्त्रालयले विस्तृत अध्ययन गरेर त्यसको स्थिति के छ र के कसरी सञ्चालन गर्न सकिन्छ', उनले भने, 'त्यसको खाका पनि तयार गरेर लिएर आउने र फेरि त्यसमा छलफल गरेर निर्णयमा पुग्‍ने भन्‍ने निर्णय भएको छ।’

बैठकले तेस्रो मुलुकबाट उद्धार जारी रहेको अवस्थामा त्यसलाई थप व्यवस्थित गर्ने निर्णय पनि गरेको छ। सचिव गुरागाईंले भने, ‘तेस्रो मुलुकबाट उद्धारको क्रम जारी रहेको अवस्थामा थप व्यवस्थित गरी थप उडानको व्यवस्था गरेर शीघ्र उद्दार गर्न बाँकी नेपाली नागरिकहरुको उद्धार गर्ने भन्‍ने निर्णय भएको छ।’

बैठकले कोभिड-१९ रोकथाम तथा नियन्त्रणलाई थप व्यवस्थित र प्रभावकारी बनाउन जनचेतना अभिवृद्धिका कार्यक्रमलाई बढाउने निर्णय समेत गरेको छ। 

त्यसका लागि स्वास्थ्य तथा जनसंख्या मन्त्रालयले जनचेतनामूलक सन्देशहरू तयार गरेर विभिन्‍न सञ्चार माध्यमबाट प्रसारण गर्ने व्यवस्था गर्ने सम्बन्धमा समेत निर्णय भएको सचिव गुरागाईंले बताए।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.