संविधान जारी भएपश्चात् मधेशकेन्द्रित र अन्य दलबीच देखिएको विवाद पछिल्लो समय ध्रुवीकृत भएको छ। चुनाव घोषणा गरेपश्चात् मोर्चा र एमालेबीच तीर हानाहान जुहारी चलेको छ। जनता निराश छन्। सरकार जुहारीमा रमिते बनेको छ । उक्त जुहारीको केही अंशः
मोर्चा : संविधान संशोधन किन गर्न दिन्नौ?
हाम्रो बाटोमा अवरोध तिमी नबन्देऊ।
ठूलो शक्ति भनेर फुर्ती गर्छौ किन?
सक्छौ भने आऊ तराई शक्ति हातमा लिन।
एमाले : पहाडबाट तराई झर्यौँ मेची महाकाली
शक्ति देखाउन आयौँ हामी पूरै हामफाली।
तिम्रा मान्छे भन्दा हेर हाम्रा मान्छे कडा
तिम्रा पाखुरा भन्दा हाम्रा पाखुरा नै बडा।
मोर्चा : देख्या छैनौ तिमीले नि हेर्लाऊ हाम्रो शक्ति
यो देशमा चलिरा'छ शक्ति हुनेको भक्ति।
त्यसैले त हामी पनि शक्ति देखाई छाड्छौँ
अब तराई झर्यौ भने हामी सबलाई भाँड्छौँ।
एमाले : हामीलाई हेप्यौ भने चाल पाउला फेरि
हाम्रा पनि भुसतिघ्रे छन् तिम्रो चाला हेरी
फुर्ती धेरै गर्यौ भने डिल कटाइदिउँला
चुनावमा चुनौतीको हिसाब-किताब लिउँला।
मोर्चा : हाम्रो गाउँमा आउँछौ अनि हामीलाई नै घुर्की
हैसियत तिम्रो देखाइदिउँला नगर धेर फुर्ती
कति गर्छौ चुनावको चुरिफुरी रेला
छिट्टै देख्छौ तिमीले अब हाम्रो शक्तिको खेला।
एमाले : अब चुनाव हुन्छ तिमी हेरिहेरी बस
आफ्नै बुद्धिको जालमा अब तिमी फस
सक्छौ भने चुनाव जित्न आऊ घुँडा धस
होइन भने जोगी बनी खरानी घसी बस।
मोर्चा : कसो गरी गर्छौ चुनाव हामीविना तिमी?
कसैगरी चुनाव हुन्न देखाइदिन्छौँ हामी
सप्तरीमा हाम्रो शक्ति देखी भागिसक्यौ
चुचुरामा चढ्छु भन्थ्यौ पातालमा खस्यौ।
एमाले : जनताले भोट हाल्छन् हामी बन्छौँ नेता
तिमीहरू पराईका भयौ प्यारा बेटा
देशको माया भएदेखि चुनावमा आऊ
हैन भने झोला बोकी परदेशतिरै जाऊ।
मोर्चा : हाम्रो भूमि तिम्रो आदेश कसो गरी चल्छ?
अमृत, बिष जेजे रोप्छौ त्यही त्यही फल्छ
हात मिलाए हात दिन्छौँ काँध मिलाए काँध
लात्ती नै बजार्ने भा' जस्तोलाई त्यस्तै मान।
एमाले : ठूलो, सानो भन्ने कुरा बलले हुने होइन
तिम्रो साथमा लठैत होलान् जनताचाहिँ छैन
हिम्मत भए चुनाव लड जिती हाम्लाई देखाऊ
चुनाव गर्न यो देशलाई मार्ग प्रशस्त गराऊ।
मोर्चा : आफ्नो मात्र कुरा गर्छौ हाम्रो सुन्ने होइन
यस्तो चालले मधेशीको मन जित्ने छैन
गर्छौ भने भिरालोमा चुनाव गराई जाऊ
सम्मतिर गर्ने भए हात मिलाई आऊ।
एमाले : हात मिलाउने तिमीसँग कुन धारमा लेख्या?
तिमीविना चुनाव हुन्छ खै तिमीले देख्या?
हेर्याहेर्यै होलाF भोलि हामीले जितेपछि
ठूलो भाग पाउँछु भन्दा पा'को पनि खति!
मोर्चा : उपदेश दिने कष्ट नगर है धेरै
हाम्रो धैर्य टुट्नलाई लाग्दैन है बेरै
ज्वालामुखी विष्फोट होला पर्ला आत्थुआत्थु
सखाप पार्ला तिमीलाई बुझ बरु नात्थु!
एमाले : फकाउँदा घुर्की लाउँछौ खालाऊ ठूलो भाग
अरूलाई छेकबार नगरी आफ्नो बाटो लाग
केही फरक पर्दैन तिमीविना हाम्लाई
चुनाव जिती माला लाउँछौँ देखाइदिन्छौँ तिम्लाई।
मोर्चा : धेरै फुर्ती गर्न थाल्यौ मेरो पारो तात्यो
यस्तै पारा हो भने पार्दिऊँ गाला रातो?
लु त हेरौँ हामीविना कसो गरी गर्छौ?
हामीविना मधेशमा कसरी वैतर्णी तर्छौ?
सरकार : तिमी दुईका विवादले कुर्सी मेरो हल्यो
बाघ सरकार बन्ने भन्या कमजोर पो कहल्यो
कति विवाद गर्छौ धेरै दिमाग चाट्ने गरी
किन मलाई चैन दिन्नौ 'डिस्टर्व' घरिघरि!
जनता : ए! भो, भो, भो, अति भो विवादका खानी
तिम्रा धेरै विवादले देशलाई हुन्छ हानि
छोड तिम्रा जय मधेश, छोड लालसलाम
छोड तिम्रा लिँड्के तर्क छोड हठ अडान।
जनता र यो देशलाई हृदयमा राखी
सबै हाम्रा दाजु-भाइ सबलाई च्याप काखी
मिलिजुली गर सबै जेजे गरे पनि
हैन भने जनताले लिन्छन् हिसाब गनी।
सबै मिले हुन्छ कुरा सबै समाधान
यति कुरा जनताको अक्षरश: मान
भन सबले आजदेखि देश बनाउने नेपाल
सबले भन हात मिलाई देश जय नेपाल!
तपाईंको ईमेल गोप्य राखिनेछ ।