|

बैतडी : भारतसँग जोडिएका​ बैतडीसहित सुदूरपश्चिम प्रदेशका नाकाहरू खुला गर्ने सरकारी निर्णय कार्यान्वयनमा समस्या निम्तिएको छ। सरकारले भारतसँग सीमा जोडिएका सुदूरपश्चिमका सबै नाका शुक्रबारदेखि खोल्ने निर्णय गरेको थियो।

बैतडीको झुलाघाट, दार्चुलाको पुलघाट, कैलालीको गौरीफन्टा र कञ्चनपुरको गड्डाचौकी नाकालाई सञ्चालनमा ल्याउने निर्णय गरेपनि नाकामा अझै आवतजावत हुन नसकेको बैतडीका प्रमुख जिल्ला अधिकारी मोहनराज जोशीले जानकारी दिए।

'नेपालले निर्णय गपनि भारतीय पक्षबाट नाका खोल्नेबारे अझै जानकारी आएको छैन,' उनले भने, ‘नेपाल सरकारले बिहीबार गरेको निर्णय सहितको पत्र भारतीय स्थानीय प्रशासनलाई पठाएका छौं, उनीहरूले पनि आफ्नो माथिल्लो निकायलाई पत्राचार गरिसकेको जानकारी प्राप्त भएको छ। तर नाका खोल्नेबारे भारतीय पक्षबाट जानकारी नआउँदा आवतजावत हुन सकेको छैन।’

सरकारले सीमा नाका खोल्ने निर्णय गरेकाले धेरै नागरिक नाकामा पुगेका, तर उनीहरू नाकामै अलपत्र परेका छन्। नाका खुल्ने खबरले झुलाघाट नाकामा पुगेकाहरू अलपत्र परेका हुन्। सुदूरपश्चिमका सबै नाकामा भारतीय पक्षबाट नाका खोल्नेबारे अझै सहमति नआएकाले समस्या भइरहेको हो।

नेपालका तर्फबाट नाका खोल्नेबारे कुनै समस्या नभएपनि भारतीय पक्षको निर्णय आउन बाँकी रहेको प्रमुख जिल्ला अधिकारी जोशीले बताए। सरकारले गरेको निर्णय कार्यान्वयन नहुँदा नागरिकलाई भने समस्या भएको छ।

नाका खुलेको खबरले नाकामा पुगेकाहरूले आवतजावत गर्न नपाउँदा उनीहरू नाकाबाट फिर्ता हुनुपर्ने अवस्था रहेको छ। भारतीय पक्षको निर्णय आउने बित्तिकै नाकाबाट आवतजावत हुन सक्ने जिल्ला प्रशासन कार्यालय बैतडीले जनाएको छ।

यस्तै, लामो समयदेखि नाका बन्द हुँदा सीमावर्ती झुलाघाट बजारका व्यापारी पलायन हुन थालेका छन्। कोरोना भाइरस रोकथाम तथा नियन्त्रण गर्न नेपाल सरकारले गत चैतदेखि नै नाकाहरू बन्द गरेको थियो।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.