एजेन्सी : भारतमा हालसम्म ४५ लाख भन्दा बढी व्यक्तिले कोभिड भ्याक्सिन लगाएका छन्।
गत जनवरी १६ देखि भारतमा कोभिड–१९ विरुद्धको खोप कार्यक्रम शुरू भएको हो। कोरोना भाइरसविरुद्ध खोप लगाउनेमा प्रायः स्वास्थ्यकर्मी रहेका समाचारहरूमा उल्लेख छ।
कोरोना भाइरस सङ्क्रमितको सङ्ख्या भारतमा बुधबारसम्म १ करोड ७ लाख ९० हजारभन्दा बढी पुगेको छ। विगत २४ घण्टा अवधिमा भारतमा १२ हजार ८९९ नयाँ सङ्क्रमित फेला परेपछि कोरोना सङ्क्रमितको सङ्ख्या १ करोड ७ लाख ९० हजार १८३ पुगेको केन्द्रीय स्वास्थ्य तथा परिवार कल्याण मन्त्रालयले जानकारी दिएको छ।
भारतमा गत २४ घण्टामा कोरोना सङ्क्रमणको कारण १०७ जनाको मृत्यु भएपछि कोरोनाभाइरसबाट मृत्यु हुनेको सङ्ख्या एक लाख ५४ हजार ७०३ जना पुगेको छ। मन्त्रालयको पछिल्लो विवरणमा भारतमा एक करोड चार लाख ८० हजारभन्दा बढी व्यक्ति सङ्क्रमणमुक्त भएको देखिएको छ। हाल भारतमा एक लाख ५५ हजार २५ जना सक्रिय सङ्क्रमित रहेका छन्।
भारतको राष्ट्रिय राजधानी दिल्लीमा बुधबार १५० जना थप व्यक्तिमा कोरोना भाइरसका सङ्क्रमण देखिएको र छ जनाको मृत्यु भएको छ। भारतमा कोभिड-१९ शुरू भएयता भाइरस सङ्क्रमणको कारण दिल्लीमा १० हजार ८६४ को मृत्यु भइसकेको छ।
यसैबीच, सरकारले देशका विभिन्न भागमा कोभिड–१९ परीक्षणलाई तीव्रता दिने बताएको छ। भारतीय स्वास्थ्य अनुसन्धान परिषद्ले बुधबारसम्म देशभर १९ करोड ९२ लाख १६ हजारको हाराहारीमा नमूना परीक्षण गरेको छ। बुधबार एकै दिनमा ७ लाख ४२ हजारभन्दा बढी व्यक्तिलाई कोभिड-–१९ परीक्षण गरेको जनाइएको छ।
तपाईंको ईमेल गोप्य राखिनेछ ।