महेन्द्रनगर : नेकपा एमालेका अध्यक्ष केपी शर्मा ओलीले पार्टीको मेची महाकाली राष्ट्रिय अभियान समापनका क्रममा शुक्रबार नेपाली कांग्रेसका सभापति शेरबहादुर देउवाको आलोचना गरे। उनले महाभारतमा अर्जुन र द्रोणाचार्यको प्रशंग झिकेर देउवाले खाली आफू सत्तारोहण हुने चाहनामात्र राखेको भन्दै आलोचना गरेका हुन्।
उनले देउवालाई आलोचना गर्ने क्रममा अर्जुन र द्रोणाचार्यको कथा सुनाए। अहिले देउवा चुनाव भन्दा पनि संविधान संशोधन गरेरै जानुपर्छ भनेर लागेको भन्दै उनले भने ' उहाँ कदमपछि कदमको कुरा गरिराख्नुभएको छ। शेरबहादुरजी सम्झिदा अर्जुनका गुरु द्रोणाचार्यको एउटा वार्ता याद हुन्छ।'
त्यसपछि उनले कथा सुनाए।
गुरु द्रोणाचार्यले अर्जुनलाई सोधे - तिम्रो अगाडिको रुख देखेका छौ?
अर्जुनले भने - देखेको छैन।
द्रोणाचार्यले फेरि सोधे - चरा देखेका छौं
अर्जुनले भने - छैन
द्रोणाचार्यले फेरि सोधे - चराको टाउको देखेका छौ त?
अर्जुनले त्यो पनि देखेको छैन भने।
अनि द्रोणाचार्यले सोधे - के देखेका छौ त?
अर्जुनले भने - त्यो चराको आँखा मात्र देखेको छु।
ओलीले त्यो कथालाई देउवामा ल्याएर जोडे 'अहिले शेरबादुरले त्यही आँखो देख्नुभएको छ। जेठ मात्र देख्नुभएको छ। जेठ कहिले लाग्ला र आँखा भेटौंला भन्ने लागेको छ।'
ओलीले देउवालाई कहिले जेठ लाग्ला भन्ने भएको भन्दै कटाक्ष गरे। 'उहाँलाई क्यालेन्डरमा चैत, बैशाख छ भन्ने पनि थाहा छैन। उहाँ कुहिरोको काग बन्नुभएको छ।'
उनले यदि देउवा साँच्चै त्यस्तो भएको हो भने आफूले काठमाडौं फर्किएपछि सम्झाउने बताए।
तपाईंको ईमेल गोप्य राखिनेछ ।