नाटकीय खेलमा बार्यन म्युनिखलाई पराजित गर्दै साविकको विजेता रियल मड्रिड च्याम्पियन्स लिग फुटबल प्रतियोगिताको सेमीफाइनलमा प्रवेश गरेको छ।

क्रिष्टियानो रोनाल्डोको ह्याट्रिकको मद्दतले क्वार्टरफाइनलको दोस्रो लेगमा रियल ४-२ ले विजयी भयो। पहिलो लेग २-१ ले जितेको रियल समग्रमा ६-३ ले अघि रहँदै सेमीफाइनलमा प्रवेश गरेको हो।

रोबर्ट लेवान्दोस्कीको पेनाल्टी र सर्जियो रामोसको आत्मघाती गोलको मद्दतले पाहुना टोली बार्यन निर्धारित समयमा २-१ ले अघि थियो। रियलका लागि १ गोल रोनाल्डोले गरेका थिए।

८४औं मिनेटमा अर्टुरो भिडाल दोहोरो पहेँलो कार्ड पाउँदै मैदानबाट बाहिरिए पछि बार्यन १० खेलाडीमा सिमित भयो, जसको असर अतिरिक्त समयको खेलमा पर्‍यो।

अतिरिक्त समयमा ७ मिनेट भित्र रियलले ३ गोल थप्यो। १०५ र ११०औं मिनेटमा रोनाल्डो तथा ११२औं मिनेटमा मार्को एसेन्सोले गोल गरे। यो नतिजाले रियललाई पुन: एकपटक उपाधितर्फ अघि बढाएको छ।

निर्धारित समयमा पछि परेको टोलीले अतिरिक्त समयमा ७ मिनेटभित्रै ३ गोल गर्दा खेल नाटकीय बन्न पुग्यो।