एमालेको अवरोधपछि रोकियो संसदमा प्रधानमन्त्री प्रचण्डको सम्बोधन

संसद भवनबाट जारी लाइभ अपडेट आजलाई यति नै। थाहाखबरसँगै रहनुहोला। 

नीति तथा कार्यक्रम प्रस्तुत गर्दा राष्ट्रपतिले गर्ने सम्बोधन पनि अवरुद्ध हुन्छ? भन्ने पत्रकारको प्रश्नमा एमाले प्रमुख सचेतक भानुभक्त ढकालको जवाफः "अवरुद्ध संसद खुलाउने वातावरण सरकारले बनाउनुपर्छ। यस्तो वातावरण स्थानीय तहको संख्या बढाउने निर्णय फिर्ता लिएरमात्र बन्दछ।'

प्रमुख प्रतिपक्षी नेकपा एमालेका प्रमुख सचेतक भानुभक्त ढकाल : "प्रमुख प्रतिपक्षीसँग छलफल गरेर मात्र स्थानीय तहको संख्या बढाउने विगतको सहमति सत्तारुढ दलहरुले उल्लंघन गरेका कारण संसद बैठक अवरुद्ध गर्ने निर्णय गरेका हौँ। प्रधानमन्त्रीज्यूको राजीनामा आउँदैछ भन्ने हामीलाई पनि थाहै थियो। तर हाम्रो उद्देश्य प्रधानमन्त्रीको राजीनामा रोक्ने नभएर असंवैधानिक तवरले स्थानीय तहको संख्या बढाउने निर्णय फिर्ता होस् भन्ने थियो।" (संसद भवनबाट बाहिरिँदै)

भोलि ११ बजे संसद बैठक बस्नुअघि ९ बजे प्रधानमन्त्री निवास बालुवाटारमा प्रमुख तीन दलका शीर्ष नेताको बैठक बस्ने छ। बैठकले अवरुद्ध संसद खुलाउन सहमति खोज्नेछ। 

नेपाली कांग्रेसका प्रमुख सचेतक चिनकाजी श्रेष्ठ : "प्रधानमन्त्रीले सदनमा बोल्छु भन्दा पनि समय नपाएको यो पहिलो पटक हो। संसदको नियमित बिजनेस अवरोध गर्ने वा चल्न नदिन पाइन्छ तर प्रधानमन्त्रीलाई बोल्न दिन्न भनेर पहिलोपटक जोरजबर्जस्ती भयो।" (संसद भवनबाट बाहिरिँदै)

संसद भवनबाट भइरहेको लाइभ अपडेट आजलाई यति नै। थाहाखबरसँगै रहनुहोला। धन्यवाद। 

प्रधानमन्त्री पुष्पकमल दाहाल प्रचण्डले आज व्यवस्थापिका संसदलाई सम्बोधन गर्दै राजीनामा दिने तयारी गरे पनि हिजो तराईका १२ जिल्लामा स्थानीय तहहरु थपिएको विरोधमा प्रमुख प्रतिपक्षी नेकपा एमालेले संसद अवरोध गर्ने चेतावनी दिएपछि आज बैठक नै बस्न सकेन। 

संसद बैठक बुधबार (भोलि) बिहान ११ बजेसम्मका लागि स्थगित भएको छ। 

साँझ ५ बजे बस्ने भनिएको संसद बैठक दुई घण्टा बित्न लाग्दा पनि बस्न नसकेपछि पुनः सूचना टाँसेर स्थगित गर्ने तयारी भएको थाहाखबर सम्वाददाता लिलाराज खनालले जनाएका छन्। यसका लागि अहिले कार्य व्यवस्था परामर्श समिति बैठक बस्दैछ। नियमाअनुसार बैठक दुई घण्टाभन्दा बढी स्थगित गर्न मिल्दैन।

साँझ ५ बजे बस्ने भनिएको संसद बैठक दुई घण्टा बित्न लाग्दा पनि बस्न नसकेपछि पुनः सूचना टाँसेर स्थगित गर्ने तयारी भएको थाहाखबर सम्वाददाता लिलाराज खनालले दिएका छन्। यसका लागि अहिले कार्य व्यवस्था परामर्श समिति बैठक बस्दैछ। नियमानुसार बैठक दुई घण्टाभन्दा बढी स्थगित गर्न मिल्दैन।

साँझ ५ बजे बस्ने भनिएको संसद बैठक दुई घण्टा बित्न लाग्दा पनि बस्न नसकेपछि पुनः सूचना टाँसेर स्थगित गर्ने तयारी भएको थाहाखबर सम्वाददाता लिलाराज खनालले दिएका छन्। यसका लागि अहिले कार्य व्यवस्था परामर्श समिति बैठक बस्दैछ। नियमाअनुसार बैठक दुई घण्टाभन्दा बढी स्थगित गर्न मिल्दैन। 

संसद बैठक सुचारु गर्न सहमति खोज्न सभामुख ओनसरी घर्तीले शीर्ष अहिले नेताबीच छलफल गराइरहेकी छन्। फोटोः दिनेश श्रेष्ठ/प्रम सचिवालय

संसद भवनमा प्रवेश गर्दै परराष्ट्रमन्त्री डा. प्रकाशशरण महत, रक्षा मन्त्री बालकृष्ण खाँड र सूचना तथा सञ्चारमन्त्री सुरेन्द्र कार्की।

संसद भवनमा प्रवेश गर्दै अगाडिबाट परराष्ट्रमन्त्री डा. प्रकाशशरण महत, रक्षा मन्त्री बालकृष्ण खाँड र सूचना तथा सञ्चारमन्त्री सुरेन्द्र कार्की।

संसद सुचारु गर्ने विषयमा शीर्ष नेताहरुबीच सहमति नजुट्दा बैठकबारे अन्योलता देखिएको छ। धेरै सांसदहरु संसद भवन परिसरमा देखिन्छन्। 

संसद बैठकको अन्यौलताका बीच दिउसो ३ बजेदेखि रिपोर्टिङमा रहेका पत्रकारहरु संसद भवन बाहिर। बैठक ५ बजे बस्ने भनिए पनि अहिलेसम्म बस्न सकेको छैन। अहिले शीर्ष नेताहरुको बैठक जारी छ।   

बिहान ११ बजे हुने भनिएको संसद बैठक ३ बजे राखिएको थियो। स्थानीय तहको संख्या थपिएको विरोधमा बैठक अवरुद्ध गर्ने एमालेको चेतावनी पछि बैठक ५ बजेसम्मका लागि सूचना टासेर स्थगित भएको थियो। 

संसद बैठक सुचारु गर्न अहिले शीर्ष नेताहरुबीच छलफल जारी रहेको थाहाखबर सम्वाददाता लिलाराज खनालले जनाएका छन्। बैठकमा प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली र नेता सुवास नेम्वाङ, कांग्रेस सभापति शेरबहादुर देउवा र रामचन्द्र पौडेल छन्।

प्रमुख प्रतिपक्षी नेकपा एमालेका अध्यक्ष केपी शर्मा ओली भर्खर संसद भवन आइपुगेका छन्। ३ बजे बस्ने भनिएको संसद बैठक ५ बजेसम्मका लागि सूचना टाँसेर स्थगित गरिए पनि अझै सुरु हुन सकेको छैन। 

आज प्रधानमन्त्री पुष्पकमल दाहाल प्रचण्डले संसद बैठकलाई सम्बोधन गर्ने तयारी गरेका छन्। तर तराईका जिल्लामा स्थानीय तह थप गरिएको विरोधमा एमालेले संसद बैठक अवरुद्ध गर्ने चेतावनीपछि ३ बजेको संसद बैठक ५ बजेलाई सरेको छ। संसद भवनमा के भइरहेको छ थाहा पाउन हामीसँगै रहनुहोला।

एमाले अध्यक्ष केपी शर्मा ओलीले स्थानीय तहको संख्या थप्ने सरकारको निर्णयले निर्वाचनको तयारीमा प्रतिकुल प्रभाव पार्ने र निर्वाचनलाई अन्यौलमा धकेल्ने बताएका छन्।  

भर्खरै : संसद बैठक साँझ ५ बजेसम्मका लागि सूचना टाँसेर स्थगित भएको थाहाखबर सम्वाददाता लिलाराज खनालले जनाएका छन्।  

यसैबीच, भर्खरै प्रमुख प्रतिपक्षी नेकपा एमालेका अध्यक्ष केपी शर्मा ओलीले पत्रकार सम्मेलन गरी स्थानीय तह थप्ने सरकारको निर्णयमा आपत्ति जनाएका छन्। उनले प्रेस विज्ञप्तिमा लेखेका छन्- 'पहिलो चरणको निर्वाचन सम्पन्न भइ अधिकांश स्थानको निर्वाचन परिणाम घोषणा भइसकेको अवस्थामा गरिएको यो निर्णय निर्वाचन क्षेत्रको दूराशयपूर्ण हेराफेरीको नमुना हो।'

नेकपा एमाले संसदीय दलका प्रमुख सचेतक भानुभक्त ढकालले 'सरकारले आफूहरुसँग सहमति नगरी स्थानीय तहको संख्या बढाएकोले यस विषयमा प्रष्ट नपारी संसद बैठक चल्न नदिने' जानकारी थाहाखबरलाई दिए।  

हिजो बेलुका मन्त्रिपरिषदले तराईका १२ जिल्लामा २२ स्थानीय तह थप गरेको विरोधमा प्रमुख प्रतिपक्षी नेकपा एमालेले संसद बैठक अवरोध गर्ने तयारी गरेपछि सत्तापक्षले उसलाई मनाउन प्रयास गरिरहेको थाहाखबर सम्वाददाता लिलाराज खनालले जनाएका छन्। 

३ बजे बस्ने भनिएको संसद बैठक १ घण्टा पुगिसक्दा पनि बस्न सकेको छैन। समय तोकिएको २ घण्टाभित्र बैठक बस्नुपर्ने नियम छ। बस्न नसकेमा संसद बैठक स्वतः स्थगित हुन्छ। संसदको कार्यव्यवस्था परामर्श समितिको बैठक पनि अहिलेसम्म बसेको छैन।

प्रधानमन्त्री पुष्पकमल दाहाल प्रचण्ड, नेपाली कांग्रेस सभापति शेरबहादुर देउवा र नेकपा एमाले संसदीय दलका उपनेता सुवासचन्द्र नेम्वाङबीच दिउसो सवा ३ बजेदेखि छलफल जारी रहेको थाहाखबर सम्वाददाता लिलाराज खनालले जनाएका छन्। 

प्रमुख प्रतिपक्षी नेकपा एमालेका अध्यक्ष केपी शर्मा ओली संसद भवन आइसकेका छैनन्। 

संसद बैठकको कार्यसूची यस्तो छः 

थाहाखबर सम्वाददाता लिलाराज खनालका अनुसार सबैजसो सांसद तथा मन्त्रीहरु संसद भवन आइसकेका छन्। तराईका १२ जिल्लामा स्थानीय तहको संख्या बढाउने सरकारको निर्णयमा असन्तुष्टि जनाएको प्रमुख प्रतिपक्षी नेकपा एमालेलाई मनाउन भैरहेको प्रयासका कारण संसद बैठक केही ढिलो हुने देखिएको छ।

आज बसेको मन्त्रिपरिषद् बैठकले राष्ट्रिय समाचार समितिको महाप्रबन्धकमा ओपेन्द्र शर्मालाई नियुक्त गरेको छ। मन्त्रिपरिषद् बैठक सकेर प्रधानमन्त्री सम्बोधनका लागि संसद भवन आएका छन्। 

काठमाडौं नयाँ बानेश्वरस्थित व्यवस्थापिका संसद भवन

मन्त्रिपरिषद् बैठक केही बेर अघि सकिएको छ। प्रधानमन्त्रीको सरकारी निवास बालुवाटारमा बैठक सकेर प्रधानमन्त्री संसद भवन आएका छन्। मन्त्रिपरिषद बैठक सकिएपछि मन्त्रीहरुले सामूहिक फोटो खिचाएका छन्। 

प्रधानमन्त्री पुष्पकमल दाहाल प्रचण्डले व्यवस्थापिका संसदमा सम्बोधन गर्दैछन्। सम्बोधनको भिडियो र टेक्स्ट लाइभका लागि थाहाखबर हेर्दै रहनुहोला।