काठमाडौं : स्थानीय तहको पुनर्संरचनापछि उपमहानगरपालिकामा स्तरोन्नति भएको घोराहीमा स्थानीय तहको निर्वाचनमा कुन राजनीतिक दलले विजय हासिल गर्ने भन्ने चर्चाको विषय बनेको छ। प्रदेश नम्बर ५ को सम्भावित राजधानीको रुपमा हेरिएको यस उपमहानगरपालिकाको नेतृत्व आफ्नो पक्षमा पार्न प्रमुख दलहरुले प्रचार प्रसार पनि तिब्र पारेका छ्न्।
घोराही उपमहानगरपालिकाको प्रमुखमा नेपाली कांग्रेसबाट भुपबहादुर डाँगी, नेकपा एमालेबाट उम्मेदवारी दिएका नरुलाल चौधरी र माओवादी केन्द्रबाट उम्मेदवारी दिएका जीवन गौतमले उम्मेदवारी दिएका छन्।
यसअघि भएका दुईवटा संविधानसभा निर्वाचनमध्ये पहिलोमा माओवादी र दोस्रोमा काँग्रेसले जितेको आधारमा घोराहीमा कांग्रेस बलियो मानिन्छ। त्यसैगरी किसान परिवारबाट आएका र स्थानीय वासिन्दासँग राम्रो सम्बन्ध भएका एमाले उम्मेदवार चौधरी उत्तिकै बलियो मानिन्छन्। माओवादी केन्द्र पनि कमजोर नभएकाले घोराहीमा त्रिपक्षीय प्रतिस्पर्धा नै हुने धेरैको आँकलन छ।
घोराही उपमहानगरपालिकामा कूल ७८ हजार ४ सय २७ मतदाता छन् जसमा थारु मतदाताको संख्या उल्लेख्य छ। असार १४ गते हुने चुनावमा घोराही उपमहानगरपालिकामा कुन दलका उम्मेदवार कस्ता छन् भन्ने विषयमा यहाँ चर्चा गरिएको छ।
भुपबहादुर डाँगी- नेपाली कांग्रेस
डाँगी कांग्रेसको दाङ क्षेत्र नम्बर ३ का क्षेत्रीय सभापति हुन्। २०१५ सालमा घोराही नगरपालिका–९ मा जन्मिएका उनी परिवार बसाइ सरेर साविकको सौडियार गाविस १ मा गएपछि उनले राजनीतिक जीवनको शुरुआत भने सौडियारबाट गरेका थिए।
२०३६ सालमा बहुदलको पक्षमा योगदान दिएका भुपबहादुर विपी कोइराला दाङ आएको बेला पार्टी सदस्यता लिएका थिए। २०४३ सालको स्थानीय चुनावमा सौडियार गाविस वडा नम्बर १ को अध्यक्षमा निर्विरोध भएका उनले राजनीति र सामाजिक संघसंस्थामा सक्रिय भएका कारण अध्ययन भने कक्षा १० भन्दा अगाडि बढाउन सकेनन्।
कांग्रेसको भातृ संगठन युवक संघको सदस्य, २०४६ सालमा क्षेत्रीय सदस्य, कोषाध्यक्ष, उपसभापति हुँदै २०६६ सालमा दाङ क्षेत्र नम्बर ३ को कांग्रेस सभापति भएका थिए। २०७२ सालमा दोस्रो पटक क्षेत्रीय सभापति भएका भुपबहादुर आफ्नो क्षेत्रमा राम्रो प्रभाव भएका नेता हुन्। राजनीतिसँगै विभिन्न संघसंस्थाहरुमा क्रियाशील उनी कांग्रेस नेता खुमबहादुर खड्काका निकटका हुन्।
घोराही बनाउने कांग्रेसको योजना
नरुलाल चौधरी - नेकपा एमाले
चौधरी किसान परिवारबाट आएका नेता हुन्। २०२४ सालमा साविकको रामपुर गाविस जन्मिएका नरुलाल चौधरीले अनेरास्ववियुबाट विद्यार्थी राजनीति शुरु गरेका हुन्। २०३६ सालमा १२ वर्षको उमेरमै पार्टीका गतिविधिमा सक्रिय भएका उनी अनेरास्ववियुको क्याम्पस कमिटीबाट राजनीति अघि बढाएका थिए। एमालेको विभिन्न कमिटीमा काम गर्दै उनी २०५४ सालमा जिल्ला सदस्य भएका थिए।
व्यवस्थापनमा स्नातकसम्मको अध्ययन पूरा गरेका नरुलाल पढाइ छाडेको २२ वर्षपछि अहिले एमबिएस दोस्रो वर्ष अध्ययन गर्दैछन्। जनता मावि रामपुरमा २ वर्षसम्म शिक्षण गरेका उनी २०५२ सालमा रेडियो नेपालमा थारु भाषाको समाचार बाचकको रुपमा दुई वर्ष जागिर खाए। उनी २०५४ सालमा पार्टीले टिकट दिएपछि रेडियोबाट राजिनामा दिएर चुनाव लड्न दाङ गएका थिए।
२०५४ को स्थानीय निकायको चुनावमा रामपुर गाविस अध्यक्ष जितेका नरुलाल अखिल नेपाल किसान संघको केन्द्रीय सचिव, एमालेको सातौं महाधिवेशनमा राष्ट्रिय प्रतिनिधि परिषद् सदस्य भएका थिए भने २०६९ सालमा एमाले दाङ जिल्ला कमिटिको अध्यक्षमा निर्वाचित भएका थिए।
२०६४ सालको संविधानसभाको चुनावमा दाङ क्षेत्र नम्बर २ बाट चुनाव लडेका नरुलाल तत्कालिन नेकपा माओवादीका उम्मेदवार दामा शर्मासँग पराजित भएका थिए।
घोराही बनाउने यस्ता छन् एमालेका योजना
जीवन गौतम- नेकपा माओवादी केन्द्र
गौतम नेकपा माओवादी केन्द्रका पोलिटव्यूरो सदस्य तथा दाङ जिल्ला इन्चार्ज हुन्। ०३१ सालमा जन्मिएका उनी २०४३ सालदेखि राजनीतिमा सक्रिय भएका थिए। अनेरास्ववियुको इकाई कमिटी अध्यक्ष, २०४५ सालमा केन्द्रिय सदस्य भएर काम गरेका जीवन २०४६ सालको जनआन्दोलनमा दाङको भरतपुर स्कुलबाट विद्यार्थी आन्दोलनको अगुवाइ गरेका थिए।
२०४७ सालमा नेकपा चौमको सदस्यता प्राप्त गरेका उनले २०४९ सालमा अस्कल क्याम्पस काठमाडौंमा स्ववियूको सदस्यमा निर्वाचित भए। २०५१ मा नेकपा एकता केन्द्र दाङको जिल्ला सदस्य हुदै २०५२ सालमा अखिल (क्रान्तिकारी) को केन्द्रीय सचिव, २०५६ अखिल (२०२२) को केन्द्रीय उपाध्यक्ष, २०५८ सालमा अखिल छैठौंसँग एकता भई बनेको अखिल एकीकृतको केन्द्रीय कोषाध्यक्ष तथा २०६३ सालमा अखिल एकीकृतको महासचिव भएका थिए।
२०६३ सालमै अखिल एकीकृतको अध्यक्ष, २०६५ सालमा नेकपा एकता केन्द्र मसाल र नेकपा माओवादीबीच एकतापश्चात् बनेको एकीकृत नेकपा माओवादीको केन्द्रीय सदस्य तथा थारुवान राज्य समितिको सह सेक्रेटरी भएका जीवन २०७० देखि एमाओवादीको दाङ जिल्ला इञ्चार्जको जिम्मेवारी निर्वाह गर्दै आएका छन्।
माओवादी केन्द्रका उम्मेदवार जीवन पार्टी अहिले एक भएर आएको र विगत १० वर्षदेखि घोराही नगरको विकासको नेतृत्व गर्दै आएका कारण आफुले जित्ने बताउछन्।
घोराही बनाउने यस्ता छन् माओवादी केन्द्रका योजना
तपाईंको ईमेल गोप्य राखिनेछ ।