म विश्व हूँ विशाल हूँ स्वतन्त्रता प्रशान्त हूँ
म भूपदेखि भुक्षुमा सुकर्म तारतम्य हूँ ।
म शान्तिपूर्ण दीप हूँ र शान्तिकै म मन्त्र हूँ
नयाँ भविष्य ल्याउने स्वयम् म लोकतन्त्र हूँ ।।
नरेट व्यर्थमै गला नमारिने विचार छन्
विचार वेग क्रान्ति हो र टाउकै हजार छन् ।
हजार काटिए भने लिएर लाख उठ्दछु
नरेटिने नमारिने अमर्त्य लोकतन्त्र हूँ ।।
सबै प्रजा समान हुन् म जातपात मान्दिन
प्रपञ्च गर्न लिप्त भै, म राष्ट्रघात जान्दिन ।
थिचोमिचो विरुद्धमा म लड्न तम्तयार छु
प्रजाधिकारपूर्ति नै हुने म लोकतन्त्र हूँ ।।
म रेल हैन लीकमा कदापि गुड्न सक्दिन
म पिल्सिएर दुर्दशा सहेर मौन बस्दिन ।
समस्त राज्यतन्त्रमा म एक मूलमन्त्र हूँ
अथाह चाहना हुने उही म लोकतन्त्र हूँ ।।
म सर्वश्रेष्ठ यान हूँ चलाउछन् नि शासक
म खस्न सक्छु भीरमा परे भने कुचालक ।
खराबदेखि जोगिए सुमार्गमा म हिँड्दछु
प्रजा मताधिकारको सवार लोकतन्त्र हूँ ।।
हिमालको, पहाडको, मधेसको, म देशको
सधै हितार्थ चाहने मिलाप हूँ स्वदेशको ।
अनेकभित्र एकता रुचाउने म मन्त्र हूँ
प्रजा र राष्ट्र निम्ति निर्विकल्प लोकतन्त्र हूँ ।।
छ अन्धकार नै भने दियो जलाउने गर
दियो निभाउलान् अरु तिमी सचेतना छर ।
युवा र नौजवानमा सदैव जग्जगाउछु
समस्त देशवन्धुको अनन्य लोकतन्त्र हूँ ।।
तपाईंको ईमेल गोप्य राखिनेछ ।