दोलखा : भीमेश्वर नगरपालिका–९ लाँकुरीडाँडास्थित कुत्कुते डाँडागाउँमा पहिरो जाँदा एक जनाको मृत्यु भएको छ भने ३ जना वेपत्ता भएका छन्। मृतक शान्ति थामीको शव भेटिएको प्रहरीले जनाएको छ।
राति करिब साढे १ बजे पहिरो जाँदा कुत्कुते डाँडागाउँका मंगले थामीकी श्रीमती सन्तोषी थामी, छोरी रोशनी थामी र लाटी थामी पुरिएका हुन्। बस्ती माथिबाट ठूलो पहिरो खसेको र घर समेत बगाएका कारण उनीहरुलाई जीवितै फेला पार्ने सम्भावना कम रहेको प्रहरी निरीक्षक प्रेम केसीले जानकारी दिए।
पहिरो खस्दा उनीहरु सबै घरमा सुतिरहेका थिए। श्रीमती र दुई छोरी पुरिए पनि पहिरो जाने बेला शौचालय गएका कारण मंगले बाँच्न सफल भएका छन्। ५ जना सदस्य रहेको उनको परिवारमा तीन जना पुरिए पनि उनीसहित दुई जना बाँच्न सफल भएका छन् । मंगलेका छोरा कामको सिलसिलामा काठमाडौंमा छन् ।
पहिरोका कारण कुत्कुते डाँडागाउँ बस्तीका करिव १५ घरपरिवार उच्च जोखिममा रहेका छन्। घटनाको खबर लगत्तै खरिढुंगा प्रहरी चौकीबाट ३१ जनाको प्रहरी टोली घटनास्थलतर्फ खटिएको छ।
तपाईंको ईमेल गोप्य राखिनेछ ।