प्रदेश
जिल्लाः
निर्वाचन क्षेत्र
पार्टी

साहित्य

मेरा बा झूट बोल्छन् (कविता)
SHARES

साउन १३, २०७४

     

    बालाई यतिबिघ्न कुराहरू
    थाहा हुँदाहुँदै पनि 
    योचाहिँ थाहा भएन कि 
    बच्चाहरूले झूट बुझ्छन्।

    त्यसैले त बाले सधैँ सफा झूट बोलिरहे। 

    मलाई स्कुल ड्रेस किनेर ल्याएको दिन
    मैले बाको कमिजमाथि प्रश्न गर्दा
    बा भन्थे- 
    'बाबू, यो कमिज फाटेको होइन नि!
    यसका यति धेरै प्वालहरूबाट 
    धेरै हावा छिर्छ र 
    तिम्रो बालाई शीतल हुन्छ।' 

    मेरालागि गोल्डस्टार जुत्ता ल्याइदिएपछि
    बाले भने-
    'तिम्रो बालाई 
    पैतालामा काउकुती लाग्दा अति मजा लाग्छ 
    त्यसैले त म सधैँ खाली खुट्टा हिँड्छु।' 

    अगेनो चिसो भएको दिन बा भन्थे-
    'कहिलेकाहीँ निराहार व्रत बस्यो भने 
    भगवान खुसी हुनुहुन्छ
    र हामी सबै निरोगी हुन्छौँ।' 

    मलाई खाटमा सुताएपछि 
    बा आफू भुइँमा सुत्थे र भन्थे-
    'तिम्रो बालाई
    खाटमा लचकदार डन्लपमा सुत्यो भने 
    एकदम ढाड दुख्छ।'

    मलाई साइकल किनेर ल्याएको दिन 
    बाले भने-
    'मैले वर्षौंदेखि चढ्दै आएको 
    यो साइकल बिरामी परेको छ 
    त्यसैले म पैदल हिँडेको बाबू।'

    मेरालागि खानेकुराहरू ल्याएर 
    बाले भने-
    'गुँदपाक, रसवरी, मीठाईहरूले 
    मलाई कत्ति पनि फाइदा गर्दैनन्।'

    मैले छिमेकीको नयाँ घर देखाउँदा 
    बा भन्थे-
    'यो हामी बस्दै आइरहेको घरमा 
    धेरै लच्छिन छ 
    त्यसैले मैले अर्को घर नबनाएको।' 

    बा मेरो पेट भोको देख्न सक्दैनथे
    र साहुको खेत अधियाँ गर्थे 
    तर रमाइलो झूट बोल्थे- 
    'अरुको नै भए पनि 
    जग्गा जमिन बाँझो छोड्यो भने 
    अन्नमाता रिसाउँछिन् र हामीलाई श्राप दिन्छिन्।'

    बालाई यतिबिघ्न कुराहरू
    थाहा हुँदाहुँदै पनि 
    योचाहिँ थाहा भएन कि 
    बच्चाहरूले झूट बुझ्छन्।

प्रज्वल अधिकारी

अधिकारी नेपाली साहित्यका कविता, गीत र गजलमा कलम चलाउँदै आएका छन्।

सम्बन्धित समाचार

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
मुक्तिश्री टावर
नयाँ बानेश्वर, काठमाडौं, नेपाल

इमेलः
समाचार विभाग: news@thahakhabar.com
बिज्ञापनः ad@thahakhabar.com
फोन : ९७७-१- ४७८६५६२

थाहा मिडिया ग्रुप

थाहा गणितको शुत्र होइन । कुनै मन्त्र पनि होइन । थाहा त चेतनाको त्यो झिल्को हो जसले हाम्रो दृष्टिलाई फराकिलो बनाउंँछ, हाम्रो विचारलाई उघारो बनाउँछ, हाम्रो कामलाई ठिक बनाउँछ र हाम्रो जीवनलाई थप सहज बनाउँछ । थाहा एउटा प्रकृया हो ... [विस्तृत]