बाँके : भारतले जडीबुटी निकासीमा वस्तु तथा सेवा कर ‘जीएसटी’ लगाएपछि नेपाली जडीबुटी व्यवसायी समस्यामा परेका छन्। यसअघि केही वर्षदेखि भारतको उत्तर प्रदेश सरकारले लगाएको ‘ट्रान्जिट परमिट’को मार खेप्दै आएको नेपाली जडीबुटीमाथि जीएसटीसमेत लगाइएपछि व्यवसायी दोहोरो मारमा परेका हुन्।
‘ट्रान्जिट परमिट’ का कारण घट्दै गएको जडीबुटी निकासी जीएसटीका कारण झनै घट्ने जडीबुटी व्यवसायी संघ नेपालका अध्यक्ष मोहम्मद याकुब अन्सारीले बताए। उनका अनुसार जडीबुटी निकासीमा अवरोध बनेको ‘ट्रान्जिट परमिट’ को झण्झट हटाउन देशभरिका व्यवसायीले माग गर्दै आएका बेला जीएसटी थपिएपछि अब निकासीमा ठूलो समस्या भएकोे छ।
सरकारको जडीबुटी नीति व्यावहारिक नहुँदा देशभित्रै र बाहिर विभिन्न प्रकारका अनावश्यक प्रक्रिया पूरा गर्नुपरेको र विभिन्न थरिका कर तिर्नु परेकाले करोडौंको जडीबुटी व्यवसाय नै धरासायी हुन थालेको अन्सारीको भनाइ छ।
मध्यपश्चिमाञ्चलका पहाडी जिल्लाका किसानले उत्पादन र संकलन गरेको जडीबुटी नेपालगञ्जका व्यवसायीले भारतलगायत तेस्रो देशमा निर्यात गर्दै आएका छन्। जडीबुटीको निकासीमा नयाँ कर थपिँदा जडीबुटी किसानबाट मूल्य घटाएर जडीबुटी खरिद गर्नुपर्ने अवस्था सिर्जना भएको व्यवसायीको भनाइ छ। त्यसले गर्दा किसानलाई पनि समस्या पर्ने निश्चित भएको छ।
जडीबुटी निकासीका लागि सिमानामा पुगेपछि विभिन्न अवरोध गरिँदा व्यवसायीले जडीबुटीअनुसार किलोको दरले अनावश्यक खर्च पनि तिर्नु परेको उनीहरूको गुनासो छ। जडीबुटी भारत निकासी गर्दा व्यवसायीले जडीबुटीअनुसार किलोका दरले अनावश्यक खर्च नदिँदासम्म विभिन्न निकायले विभिन्न बहानामा दुःख दिने गरेका छन्।
सिमानामा भारतीय सुरक्षाकर्मी र भन्सारका कर्मचारीलाई खर्च नदिँदा झन समस्या भई जडीबुटी नाकामै लामो समयसम्म थन्काउनु पर्दा कुहिन थालेपछि अनावश्यक खर्च दिएर निकासी गरिरहेको व्यवसायी बताउँछन्। ‘ट्रान्जिट परमिट’ प्रणाली लागू भएपछि निकासी झन्झटिलो हुँदा अधिकांश व्यवसायीले निकासी नै बन्द गरेपछि धेरै गोदाममा थन्किएको छ।
नेपालगञ्ज नाकाबाट भारत, अमेरिका, चीन, पाकिस्तान, बंलादेश, फ्रान्स, स्विट्जरल्याण्ड, अष्ट्रेलिया र जर्मनलगायतका मुलुकमा जडीबुटी निर्यात हुँदै आएको छ। ती मुलुकमा रिठ्ठा, अमला, टिमुर, काउलो, सतुवा, बोझो, सालनदाना, चिराइतो, सुठो, सोफनल, दालचिनी, अमरदाना र जटामसीलगायतका जडीबुटी निर्यात हुने गरेको छ।
तपाईंको ईमेल गोप्य राखिनेछ ।