सुनसरी : सुनसरीमा समानुपातिक पद्धतितर्फको मतगणना आइतबार बिहान सकिएको छ। समानुपातिकको अन्तिम मतपरिणाम अनुसार नेकपा एमालेले प्रतिनिधिसभा सदस्य निर्वाचनको समानुपातिक तर्फ १ लाख १६ हजार ४ सय २ मत पाएको छ।
दोस्रो स्थानमा रहेको नेपाली कांग्रेसले १ लाख १२ हजार ४ सय ३८ मत पाएको छ। तेस्रो स्थानमा रहेको माओवादी केन्द्रले १९ हजार ५ सय ९१ मत पाएको छ। त्यसैगरी संघीय समाजवादी फोरम नेपालले १६ हजार ८ सय २६ र राजपाले ६ हजार ३ सय ७० मत पाएको छ।
विवेकशील साझा पार्टीले ४ हजार ८ सय ६९, संघीय लोकतान्त्रिक राष्ट्रिय मञ्चले २ हजार १ सय ९०, राप्रपाले २ हजार ४ सय १७, राप्रपा प्रजातान्त्रिकले २ हजार ६१ र नयाँ शक्ति पार्टीले १ हजार ४ सय ८६ मत पाएको छ।
त्यसैगरी सुनसरीमा प्रदेशसभा सदस्य निर्वाचन तर्फको समानुपातिकमा नेकपा एमालेले १ लाख ७ हजार ७ सय ९५, कांग्रेसले १ लाख २ हजार २ सय ९४ र माओवादी केन्द्रले २० हजार ७ सय ४७ मत पाएको छ।
संघीय समाजवादी फोरमले १७ हजार ५ सय २६, विवेकशील साझा पार्टीले ४ हजार २ सय ९९, राप्रपाले २ हजार ७ सय ४७, संघीय लोकतान्त्रिक राष्ट्रिय मञ्चले २ हजार ५ सय ९६, राप्रपा प्रजातान्त्रिकले २ हजार ८१ र नयाँ शक्ति पार्टीले १ हजार ७ सय ४० मत पाएको छ।
क्षेत्र नम्बर १ र २ मा एमाले तथा ३ र ४ मा कांग्रेस अगाडि
सुनसरीमा प्रतिनिधिसभा सदस्य तर्फ समानुपातिक मत परिणामका आधारमा क्षेत्र नम्बर १ र २ मा नेकपा एमाले र क्षेत्र नम्बर ३ र ४ मा नेपाली कांग्रेस पहिलो भएको छ। क्षेत्र नम्बर १ मा एमालेले ३३ हजार ३ सय ९८, नेपाली कांग्रेसले १९ हजार ५ सय ८८ र माओवादी केन्द्रले ६ हजार ८ सय ७५ मत ल्याएको छ।
क्षेत्र नम्बर २ मा एमालेले ३२ हजार ४ सय २, कांग्रेसले ३२ हजार ३ सय ८६ र माओवादी केन्द्रले ५ हजार ५ सय १८ मत ल्याएको छ। क्षेत्र नम्बर ३ मा नेपाली कांग्रेसले ३५ हजार ३ सय ५८, एमालेले ३० हजार ५ सय १३ र माओवादी केन्द्रको ३ हजार ६ सय ४४ मत पाएको छ।
क्षेत्र नम्बर ४ मा नेपाली कांग्रेसले २५ हजार १ सय ६, एमालेले २० हजार ८९ र माओवादी केन्द्रले ३ हजार ५ सय ५४ मत पाएको छ।
८७ हजार बढी मत बदर
प्रतिनिधि र प्रदेशसभा निर्वाचनमा सुनसरीमा कुल ८७ हजार ६ सय ३ मत बदर भएको छ। चार वटा निर्वाचन क्षेत्रमा प्रतिनिधिसभा सदस्य तर्फको निर्वाचनमा ३५ हजार ४ सय ३६ र प्रदेशसभा तर्फ ५२ हजार १ सय ६७ मत बदर भएको छ। सुनसरीमा ४ लाख ७४ हजार ८ सय ३१ मतदाता रहेकोमा ६९. १७ प्रतिशत अर्थात ३ लाख २८ हजार ४ सय २९ मत खसेको थियो।
खसेको मतको ८९. २१ प्रतिशत अर्थात २ लाख ९२ हजार ९ सय ९३ मत सदर भएको थियो। समग्रमा सुनसरीमा प्रतिनिधिसभा सदस्य तर्फ १०.७९ प्रतिशत र प्रदेशसभा तर्फ १५.८९ प्रतिशत मत बदर भएको छ। सुनसरीको औसत बदर मत भने १३. ३४ प्रतिशत रहेको जिल्ला निर्वाचन अधिकारी भट्टराईले बताए।
तपाईंको ईमेल गोप्य राखिनेछ ।