डडेल्धुरा : गत मंसिरमा सम्पन्न प्रदेशसभा र प्रतिनिधिसभा सदस्य निर्वाचनमा उम्मेदवारी दिएका डडेल्धुराका १४ जनामध्ये ८ उम्मेदवारले मात्रै खर्च विवरण बुझाएका छन्। निर्वाचनको मतपरिणाम प्रकाशन भएको झन्डै ४ साता पुग्दासमेत अझै ६ जना उम्मेदवारले खर्च विवरण बुझाउन बाँकी छ।
प्रतिनिधिसभाको निर्वाचनमा खर्च विवरण बुझाउने उम्मेदवारहरुमा नेपाली कांग्रेसका तर्फबाट उम्मेदवार बनेका कांग्रेस सभापति एवं प्रधानमन्त्री शेरबहादुर देउवा, राष्ट्रिय जनमोर्चाका तर्फबाट उम्मेदवार बनेका लालबहादुर जाग्री र स्वतन्त्र उम्मेदवारी दिएका कर्णसिंह रावल रहेको जिल्ला निर्वाचनका कार्यालय डडेल्धुराले जनाएको छ। प्रधानमन्त्री देउवाले आइतबार खर्च विवरण बुझाएका हुन् भने अन्य उम्मेदवारहरुले योभन्दा अगाडि नै बुझाइसकेका थिए।
देउवाको चुनाव खर्च २३ लाख
प्रधानमन्त्री शेरबहादुर देउवाले निर्वाचनमा २३ लाख ४ हजार पाँच सय खर्च गरेको विवरण जिल्ला निर्वाचन कार्यालयमा बुझाएका छन्। देउवाले सबैभन्दा बढी गोष्ठी/कार्यकर्ता परिचालनमा ७ लाख ६५ हजार खर्च गरेको विवरणका छन्।
यस्तै, मतदाता नमावली खरिदमा २५००, सवारीसाधनमा ४ लाख ५० हजार, सवारी इन्धनमा ९५ हजार, प्रचारप्रचार सामग्रीमा ९२ हजार, कार्यालय सञ्चालनमा ४ लाख ५० हजार, प्रतिनिधि परिचालन १ लाख ८० हजार र विविध १ लाख १५ हजार खर्च गरेको प्रधानमन्त्री देउवाले बुझाएको खर्च विवरणमा उल्लेख छ ।
अरू को को उम्मेदवारले कति बुझाए खर्च विवरण?
प्रदेशसभातर्फ खर्च विवरण बुझाउने उम्मेदवारहरुमा नेपाली कांग्रेसका तर्फबाट प्रदेशसभा ‘क’ का उम्मेदवार रघुवर भट्ट, राष्ट्रिय यथार्थवादी पार्टी नेपालका प्रदेशसभा ‘क’ का उम्मेदवार लालबहादुर दमाईं, राष्ट्रिय जनमोर्चाका तर्फबाट प्रदेशसभा ‘क’ मा उम्मेदवार बनेका चन्द्रसिंह बोहरा, कांग्रेसका तर्फबाट प्रदेश सभा ‘ख’ मा विजयी कर्णबहादुर मल्ल र राष्ट्रिय जनमोर्चाका तर्फबाट प्रदेशसभा ‘ख’ का उम्मेदवार पदमबहादुर ओली रहेको जिल्ला निर्वाचन कार्यालयका डडेल्धुरा निर्वाचन अधिकारी कृष्णसिंह नायकले जानकारी दिएका छन्।
८ जनाले निर्वाचन आयोगको सीमाभन्दा कम खर्च भएको विवरण पेस गरेको निर्वाचन अधिकारी नायकले बताएका छन्। राष्ट्रिय जनमोर्चाका तर्फबाट प्रतिनिधिसभामा उम्मेदवार बनेका जाग्रीले १ लाख ५२ हजार खर्च गरेको विवरण पेस गरेका छन् भने स्वतन्त्र उम्मेदवारी दिएका कर्णसिंह रावलले ४ लाख ४१ हजार खर्च भएको विवरण पेस गरेको निर्वाचन कार्यालयले जनाएको छ।
प्रदेश सभा ‘क’ मा नेपाली कांग्रेसका तर्फबाट प्रदेशसभा ‘क’ का उम्मेदवार रघुवर भट्टले निर्वाचनको सम्पूर्ण खर्च ९ लाख ५५ हजार खर्च भएको विवरण पेस गरेका छन्।
राष्ट्रिय यथार्थवादी पार्टी नेपालका प्रदेशसभा ‘क’ का उम्मेदवार लालबहादुर दमाइले ६ लाख १२ हजार पाँच सय, राष्ट्रिय जनमोर्चाका तर्फबाट प्रदेशसभा ‘क’ मा उम्मेदवार बनेका चन्द्रसिंह बोहराले निर्वाचनको खर्च ७७ हजार, कांग्रेसका तर्फबाट प्रदेशसभा ‘ख’ मा विजयी कर्णबहादुर मल्लले १३ लाख २२ हजार पाँच सय र राष्ट्रिय जनमोर्चाका तर्फबाट प्रदेशसभा ‘ख’ का उम्मेदवार पदमबहादुर ओलीले ८२ हजार खर्च गरेको विवरण पेस गरेका छन्।
प्रतिनिधिसभा सदस्यका उम्मेदवारले २५ लाख तथा प्रदेशसभा सदस्यका उम्मेदवार १५ लाखसम्म खर्च गर्न सक्ने निर्वाचन आयोगले सीमा तोकेको थियो। प्रनिनिधिसभा सदस्य निर्वाचन ऐन, २०७४ को दफा ७२ को उपदफा(४) र प्रदेशसभा सदस्य निर्वाचन ऐन, २०७४ को दफा ७२ को उपदफा (४) मा निर्वाचन खर्चको विवरण दल, उम्मेदवार वा तिनका प्रतिनिधिले निर्वाचन परिणाम घोषणा भएको मितिले ३५ दिनभित्र आयोग वा आयोगले तोकेको कार्यालयसमक्ष पेस गर्नुपर्ने व्यवस्था रहेको निर्वाचन अधिकारी नायकले जानकारी दिएका छन्।
को को बाँकी छन् खर्च विवरण बुझाउन?
प्रतिनिधिसभातर्फ एमाले र माओवादी केन्द्रको वाम गठबन्धनका साझा उम्मेदवार खगराज भट्ट, नेपाल दलितका रमेश टमटा र राष्ट्रिय मुक्ति आन्दोलन नेपालका लक्ष्मीदत्त भट्टले खर्च विवरण नबुझाएको कार्यालयले जनाएको छ । प्रदेशसभा सदस्य ‘क’ मा विजयी वाम गठबन्धनका पठनसिंह बोहराले पनि खर्च विवरण निर्वाचन कार्यालयमा पेश गरेका छैन्।
यस्तै, वाम गठबन्धनबाट प्रदेशसभा ‘ख’ मा उम्मेदवार बनेका एमालेका डा. ताराप्रसाद जोशी र नेपाल दलित पार्टीका रामबहादुर टमाटाले समेत खर्च विवरण बुझाएका छैनन्।
तपाईंको ईमेल गोप्य राखिनेछ ।