गोरखा : जिल्लाको पालुंटार नगरपालिकाको खोप्लाङले स्थानीय तह हुँदै प्रदेश र केन्द्रीय संसदमा पनि प्रतिनिधित्व गर्नेछ। बुधबार राष्ट्रियसभा निर्वाचनमा नेपाली कांग्रेस युवा नेता सुरेन्द्र पाण्डे प्रदेश– ४ बाट राष्ट्रियसभा सदस्यमा निर्वाचित भएसँगै पालुंटारको खोप्लाङबाट प्रदेश र केन्द्रको संसदमा प्रतिनिधित्व गर्नेको संख्या बढेको हो।
संघीय संरचनाअनुसार यसअघि प्रतिनिधिसभामा पूर्वप्रधानमन्त्री एवं नयाँ शक्ति नेपाल पार्टीका संयोजक डा. बाबुराम भट्टराई, गोरखा क्षेत्र नम्बर– २ को प्रदेश ‘क’बाट नयाँ शक्तिकै हरिशरण आचार्यले प्रदेशसभामा प्रतिनिधित्व गरिसकेका छन्।
बुधबार निर्वाचित पाण्डेले २ हजार २६२ मत प्राप्त गरे। उनलाई कांग्रेस, नयाँ शक्ति पार्टी नेपाल र राष्ट्रिय जनमोर्चाका मतदाताले मतदान गरे। नेपाली राजनीतिमा पालुंटारको खोप्लाङको बेग्लै इतिहास छ। यहाँ जन्मेका डा. बाबुराम भट्टराई दुई पटक संविधानसभा सदस्य निर्वाचित, एक पटक प्रधानमन्त्री र एक पटक अर्थमन्त्री भइसकेका छन्। राष्ट्रियसभा सदस्य बनेका नेता पाण्डे कांग्रेसका केन्द्रीय सदस्यसमेत हुन्।
आफू प्रधानमन्त्री र अर्थमन्त्री हुँदा जिल्लामा गरेका विभिन्न विकासे आयोजनाहरूलाई चुनावी मुद्दा बनाएर भट्टराईले पूर्व सहकर्मी तथा माओवादी केन्द्रका नेता नारायणकाजी श्रेष्ठलाई करिब ७ हजार मतले पछि पारे।
मंसिरमा सम्पन्न प्रतिनिधिसभा निर्वाचनमा भट्टराई कांग्रेसको समर्थनमा उम्मेदवार थिए। राष्ट्रियसभा सदस्य पाण्डेले भट्टराईको चुनावी प्रचारलाई राम्रै सहयोग गरेका थिए। राष्ट्रियसभा सदस्य पाण्डे, प्रतिनिधिसभा सदस्य भट्टराई र प्रदेशसभा सदस्य आचार्य सबै पालुंटार नगरपालिकाको खोप्लाङका हुन्।
त्यस्तै, यसअघि पालुंटार नगरपालिकाको उपप्रमुखमा पनि खोप्लाङकै पम्फा बसेल निर्वाचित भइन्। उनी माओवादी केन्द्रबाट उम्मेदवार भएकी थिइन्।
तपाईंको ईमेल गोप्य राखिनेछ ।