सुर्खेत : प्रदेश ६ को मन्त्रिपरिषद्को पहिलो बैठक अाइतबार बसेको छ।
नयाँ मन्त्रिमण्डल गठन भएपछि प्रदेश ६ को मन्त्रिपरिषद्को पहिलो बैठक बसेको हो। अाइतबार बसेको मन्त्रिपरिषद् बैठकले २१ वटा निर्णय पारित गरेको छ,
जसमा प्रदेश सरकारका केही सार्वजनिक लिखत प्रमाणीकरणसम्बन्धी नियमावली, २०७४, प्रदेश सरकार कार्यसम्पादन नियमावली, २०७४ र प्रदेश सरकार कार्यविभाजन नियमावली, २०७४ बैठकले पारित गरेको भूमि व्यवस्थापन, कृषि तथा सहकारीमन्त्री विमला केसीले जानकारी दिइन्।
मन्त्रिपरिषद् बैठकले कर्णालीका डोल्पा र हुम्ला जिल्लामा सडक पुर्याउने पहिलो प्राथमिकता बनाएको छ। त्यस्तै, बैठकले उत्तरका ३ नाका खोल्न पहल गर्ने, जनतासँग मुख्यमन्त्री कार्यक्रम सञ्चालन गर्ने, प्रत्येक गाउँपालिकामा एउटा घरेलु उद्योगको व्यवस्था गर्ने, ज्येष्ठ नागरिक देशदर्शन कार्यक्रम सञ्चालन गर्ने, हरित प्रदेश निर्माण गर्ने, कृषिमा अर्गानिक प्रदेश निर्माण गर्ने, लगानीमैत्री वातावरण निर्माण गर्ने तथा लगानीकर्तालाई प्रोत्साहन गर्ने रहेका छन्।
त्यस्तै १ समूह १ सहकारी निर्माण, डिजिटल प्रदेश निर्माणलगायतका निर्णय पारित गरिएको सरकारका प्रवक्ता एवं भूमि व्यवस्थापन, कृषि तथा सहकारीमन्त्री विमला केसीले जानकारी दिइन्।
मन्त्रीहरूद्वारा पदभार ग्रहण
प्रदेश ६ का ६ जना मन्त्रीले अाइतबार आफ्नो पदबहाली गरेका छन्। प्रदेश प्रमुख दुर्गाकेशर खनालले मन्त्रीहरूलाई शपथ खुवाएपछि मन्त्रीहरूले आइतबार अपराह्न ४ बजे आआफ्नो मन्त्रालयमा पुगेर पद बहाली गरेका हुन्।
प्रदेश ६ मा नयाँ आउने मन्त्रीको स्वागतका लागि कर्मचारीहरू बिहानैदेखि तयार भएर बसेका थिए। यस प्रदेशको सानो आकारको मन्त्रिमण्डलको आइतबारै शपथ गरी मन्त्रालयमा पुगेर मन्त्रीले आफ्नो पदबहाली गरेका हुन्।
माओवादी केन्द्रबाट आन्तरिक मामिला तथा कानुन मन्त्रालयमा नरेश भण्डारी र भूमि व्यवस्थापन, कृषि तथा सहकारी मन्त्रालयमा विमला केसीले आइतबारै पदभार ग्रहण गरेका छन्। त्यस्तै, नेकपा एमालेका तर्फबाट आर्थिक मामिला तथा योजना मन्त्रालयमा प्रकाश ज्वाला, भौतिक पूर्वाधार विकास मन्त्रालयमा खड्ग खत्री, उद्योग पर्यटन, वन तथा वातावरण मन्त्रालयमा नन्दसिंह बुढा र सामाजिक विकास मन्त्रालयमा दल रावलले पनि अाइतबारै आफ्नो पद बहाली गरेर मन्त्रालयको कामकाज सम्हालेका छन्।
तपाईंको ईमेल गोप्य राखिनेछ ।