काठमाडौं: उद्योग मन्त्रालयले सिमेन्ट उद्योगको मापदण्ड निर्धारण गर्न समिति गठन गरेको छ। शुक्रबार उद्योग मन्त्रालय प्रविधि महाशाखाका सहसचिवको संयोजकत्वमा समिति गठन भएको हो।
उद्योगबाट हुनसक्ने प्रदूषण न्यूनीकरण तथा रोकथाम गर्न जडान गर्नुपर्ने यन्त्र उपकरणको अनुगमन संयन्त्रका लागि सिमति गठन गरिएको मन्त्रालयले जनाएको छ। समितिको सदस्यमा खानी तथा भूगर्भ विभागका उपसचिव, वातावरण विभागका उपसचिव, गुणस्तर तथा नापतौल विभागका उपसचिव रहेका छन्।
त्यस्तै निजी क्षेत्रको तर्फबाट नेपाल उद्योग वाणिज्य महासंघका प्रतिनिधि, नेपाल उद्योग परिसंघका प्रतिनिधि, नेपाल सिमेन्ट उत्पादक संघका प्रतिनिधि रहेका छन्। समितिको सदस्य सचिवमा प्रविधि तथा वातावरण शाखाका निर्देशक रहने व्यवस्था गरेको छ।
उद्योग विभागका प्रवक्ता दुर्गाप्रसाद भुसालले सिमेन्ट उद्योगको स्थापनाबाट जनस्वास्थ्यमा पर्न सक्ने प्रतिकूल प्रभावलाई दृष्टिगत गरेर उक्त समिति गठन गरिएको बताए। 
समितिले दुई महिनाभित्र सिमेन्ट उद्योग सम्बन्धी मापदण्ड तयार गरेर सोको प्रतिवेदन मन्त्रालयमा बुझाउने भुसालले बताए।
तपाईंको ईमेल गोप्य राखिनेछ ।