काठमाडौं : स्वेच्छिक अवकाशमा जानका लागि निवेदन दिएका कर्मचारीमध्ये कुनै कर्मचारीले चाहेमा आवेदन फिर्ता लिन सक्ने भएका छन्।
प्रधानमन्त्री निवास बालुवाटारमा आइतबार राति बसेको मन्त्रिपरिषद् बैठकले त्यस्ता कर्मचारीले चाहेको अवस्थामा आवेदन फिर्ता लिन दिने व्यवस्था गर्ने निर्णय गरेको सञ्चार तथा सूचना प्रविधि राज्यमन्त्री गोकुलप्रसाद बाँस्कोटाले जानकारी दिए।
बैठकले संघीय संसद्मा पेश भएको सरकारको आर्थिक वर्ष २०७५-०७६ नीति तथा कार्यक्रमलाई संसदबाट सर्वसम्मतरुपमा पारित गराउन सहयोग गर्ने सांसदहरूलाई धन्यवाद दिने निर्णय गरेको छ।
मन्त्रिपरिषद् बैठकले प्रसिद्ध साहित्यकार गोपालप्रसाद रिमालको नाममा राष्ट्रिय पुरस्कार स्थापना गर्ने निर्णय गरेको सूचना प्रविधि राज्यमन्त्री एवं सरकारका प्रवक्ता बाँस्कोटाले बताए।
बैठकले नेपाल सरकार र गणतन्त्र कोरिया सरकारबीच श्रम समझदारीपत्रलाई नवीकरण गर्ने निर्णय गरेको छ भने श्रम नियमावली–२०७५ लाई स्वीकृत गर्ने निर्णय भएको पनि उनले जानकारी दिए।
सरकारले वि. सं. २०७४ साउन ८ गते चितवन जिल्लाको इच्छाकामना गाउँपालिका ६ को चारकिलो भन्ने स्थानमा पहिरो हटाउनेक्रममा निधन भएका चारजना प्रहरीका परिवारलाई जनही १० लाख रुपैयाँका दरले आर्थिक सहयोग दिने पनि निर्णय गरेको छ।
साथै, बैठकले शिक्षाको अधिकारसम्बन्धी विधेयक र संघीय शिक्षा विधेयक तर्जुमा गर्न सैद्धान्तिक सहमति दिने निर्णय गरेको सरकारका प्रवक्ता बाँस्कोटाले जानकारी दिए।
तपाईंको ईमेल गोप्य राखिनेछ ।