कञ्चनपुर : नेपाल र भारतका सुरक्षा अधिकारी सीमा क्षेत्रमा हुने अपराध रोक्न सहमत भएका छन्।
बिहीबार भारतको बनबासामा आयोजना गरिएको संयुक्त बैठकमा दुवै देशका सुरक्षा अधिकारीहरु सीमा क्षेत्रमा हुने चोरीका सवारीसाधनको अवैध पैठारी, मानव बेचबिखन, लागुऔषध ओसारपसार, वन्यजन्तुको छाला, हड्डी जस्ता अखेटोपहारको अवैध व्यापार र जाली नोटको कारोबार रोक्न सहमत भएको जिल्ला प्रहरी कार्यालय कञ्चनपुरका प्रहरी नायब उपरीक्षक नैन सिंह कार्कीले जानकारी दिए।
“बैठकमा जघन्य अपराध गरी एक अर्को देशमा लुकेर बसेका अपराधीका बारेमा सूचना आदानप्रदान गर्न, अवैध हातहतियारको कारोबारलाई नियन्त्रण गर्न र सीमा क्षेत्रमा हुने अपराध नियन्त्रण गर्न दुवै देशका सुरक्षाकर्मी सक्रिय रहने सहमति भएको छ,” उनले भने। उनका अनुसार बनबासा पुलमा आवतजावत गर्दा अनावश्यक हैरानी बेहोर्नुपरेको भनी नेपाली पक्षबाट आएका गुनासालाई सम्बोधन गर्ने, महाकालीपारि रहेको दोधारा चाँदनी नगरपालिकामा जाने सवारीसाधनलाई प्रमुख जिल्ला अधिकारीको सिफारिसमा सहज रुपमा आउजाउ गर्न दिनेलगायत सीमावर्ती क्षेत्रमा आइपर्ने अन्य समस्यालाई समन्वयात्मक ढङ्गबाट समाधान गर्ने विषयमा गहन छलफलपछि सहमति भएको छ।
नेपाली गाडी बिना अनुमतिपत्र भारत जाँदा आरटिओमा तिर्नुपर्ने जरिवाना मिनाहा गरी खटिमादेखि पूर्णागिरिसम्म निर्बाध रुपमा आवातजावत गर्न दिने मौखिक सहमति समेत भएको छ। बैठकमा नेपाली पक्षबाट सुदूरपश्चिम प्रहरी प्रमुख डिआइजी विजयराज भट्ट, कञ्चनपुरका प्रमुख जिल्ला अधिकारी मनोहरप्रसाद खनाल, प्रहरी उपरीक्षक तुलसी अधिकारीलगायतको उपस्थिति थियो। यस्तै, भारतीय पक्षबाट कुमाउ परिक्षेत्र नैनीतालका पुलिस उपमहानिरीक्षक अजय रौतेलालगायत अन्य सुरक्षा अधिकारीको उपस्थिति थियो।
तपाईंको ईमेल गोप्य राखिनेछ ।