मन्त्रालय र कार्यालय फरक-फरक जिल्लामा राखिने
मन्त्रालय र कार्यालय फरक-फरक जिल्लामा राखिने
धनकुटा : प्रदेश १ का मुख्यमन्त्री शेरधन राईले प्रदेश १ को राजधानी एकै ठाउँमा नहुने बताएका छन्। संघीयताको मर्म र भावनाको कदर गर्दै सबै मन्त्रालय, प्रदेशसभा, कार्यपालिकाका कार्यालयहरू फरकफरक जिल्लामा राख्ने बताएका हुन्।
सामाजिक विकास मन्त्रालय प्रदेश १ को आयोजनामा धनकुटामा भएको स्वास्थ्य निर्देशनालय र शिक्षा विकास निर्देशनालय स्थापना तथा उद्घाटन कार्यक्रममा यस्तो बताएका हुन्। ‘संघीयताको मर्मअनुसार प्रदेश १ सरकारको मन्त्रालय, प्रदेशसभा, कार्यपालिकाका सबै कार्यालय एउटै जिल्लामा हुँदैन,’ मुख्यमन्त्री राईले भने, ‘पायक पर्ने क्षेत्रअनुसार फरकफरक जिल्लामा प्रदेश सरकारका मन्त्रालय, कार्यपालिकाका कार्यालय राख्ने तयारी गरिएअनुसार धनकुटामा शिक्षा र स्वास्थ्यको निर्देशानालय खोलिएको हो।’
धनकुटामा शिक्षा र स्वास्थ्यको निर्देशानालय राख्ने छलफलमा निर्णयमा पुग्न प्रदेश सरकारलाई २ मिनेट पनि समय नलागेको भन्दै राईले भने, ‘प्रदेश १ का सबै जिल्लामा प्रदेश सरकारका कार्यालयहरु राख्ने प्रदेश सरकारको तयारी छ। ‘दशैंअगाडि प्रदेश सरकारका सबै कार्यालयहरू खुल्ने छन्,’ उनले भने, ‘त्यसको तयारीमा प्रदेश सरकार लागि परेको छ।’
‘धनकुटालाई प्रदेश सरकारले शिक्षा र स्वास्थ्य निर्देशनालयमा टार्ने खोजेको नसम्झनु होला यो त सुरुवात मात्रै हो’ राईले थपे ‘अरूपछि देख्दै जानुहुनेछ प्रदेशले धनकुटालाई के के दिँदो रहेछ।’ उनले सबैको सहमतिमा प्रदेशको नाम टुंग्याउने भएकाले छलफलमा रहेको बताए। प्रदेशको नाम पहिचान र प्राकृतिक कुन तरिकाले राख्ने भन्नेमा विवाद देखिएपनि त्यस्तो विवाद नरहेको केही दिनमै टुंगोमा पुग्ने राईले दाबी गरे।
सोही कार्यक्रममा बोल्ने धनकुटाका प्रदेशसभा सदस्यहरूले निरन राई, इन्द्रमणि पराजुली र कुशुम कुमारी श्रेष्ठ तथा जिल्ला समन्वय समिति धनकुटाका प्रमुख टंक चुहान र धनकुटा नगरपालिका प्रमुख चिन्तन तामाङले प्रदेश १ को राजधानी धनकुटा बनाउन मुख्यमन्त्री राईसँग माग गरेका थिए। प्रदेशको भौगोलिक केन्द्र, हावापानी, पहाडी क्षेत्रको विकास सबै किसिमले धनकुटा प्रादेशिक राजधानी हुन अपरिहार्य रहेको उनीहरूले बताएका थिए।
तपाईंको ईमेल गोप्य राखिनेछ ।