|

काठमाडौं : पत्रकार तथा साहित्यकार चेतनाथ आचार्यद्वारा लिखित ‘उपहार’ कथासङ्ग्रह शुक्रबार लोकार्पण गरिएको छ। आचार्य चिनियाँ अन्तरराष्ट्रिय रेडियोमा कार्यरत छन्।

प्रथम पुरुष शैलीमा लेखिएको कथासङ्ग्रहमा ग्रामीण इलाकामा बोलिने भाषाशैली प्रयोग भएको छ। ग्रामीण इलाकाका मानिसको वास्तविक घटनाक्रमलाई कथाको माध्यमबाट उजागर गर्ने प्रयास गरिएको छ। आठ कथा रहेको पुस्तकमा नेपाली साहित्य, पत्रकारिता र संस्कृति पनि उजागर गरिएको छ।

विश्व विज्ञान र प्रविधिको माध्यमले साँघुरिएको अवस्थालाई आधार बनाई मानवीय जीवनका बारेमा युग परिवर्तनसँगै आवश्यकतानुसार क्षमता, योग्यता तथा दक्षताका आधारमा अघि बढ्ने तरिकाका बारेमा प्रकाश पारी सामाजिक, सांस्कृतिक, धार्मिक, परम्परागत परिवर्तनको बाटो खोज्न प्रेरणा दिइएको छ। कथामा समय र परिस्थितिअनुसार विश्वविद्यालय तथा ग्रामिण इलाकामा बोलिने शिक्षित र ग्रामिण भेगका मानिसले बोल्ने भाषाको उजागर गरिएको छ।

मकालु प्रकाशनगृहको आयोजनामा भएको कार्यक्रममा कृति विमोचन गर्दै वाङ्मय शताब्दी पुरुष सत्यमोहन जोशीले साहित्य राष्ट्रको उन्नतिका साथै मान र प्रतिष्ठाको विषय भएको बताउँदै कथामा नेपाली कला, साहित्य, संस्कृति, धर्म, जातलगायत कुरालाई समेटी वास्तविक चित्रण गरिएको टिप्पणी गरेका थिए।

प्रा. डा. राजेन्द्र सुवेदीले भूकम्पका समयमा भएका मानव तस्करीका कारण सयौँ नेपाली महिला बेचिएको र उनीहरूको मिर्गौलासमेत बेचिएको घटना सन्देशमूलक रुपमा कथामा समेटिएको बताए। कथाकार माया ठकुरीले वैदेशिक रोजगारीमा गएका महिला तथा पुरुषको परिवार तथा तिनले सोच्ने सकारात्मक तथा नकारात्मक विचार तथा यौन जिज्ञासाबारे कृतिमा सन्देश दिइएको बताइन्। 

चाइना रेडियो इण्टरनेशनल सिआरआईको नेपाल प्रतिनिधि चाङ युएई (वर्षा)ले साहित्यका कारण नेपाल र चीनबीचको सम्बन्ध उच्चविन्दुमा पुगेको बताउँदै कृति अङ्ग्रेजी भाषामा प्रकाशन गरी अन्तर्राष्ट्रियस्तरमा पुर्‍याउनयोग्य रहेको विचार राखिन्। पुस्तकका भाषा सम्पादक लक्ष्मी पराजुली तथा प्रकाशनगृहका अध्यक्ष वासुदेव ढकालले पुस्तकमा भएका घटना र पात्र वास्तविक रहेको जिकिर गरेका थिए।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.