नुवाकोट : दशैँका वेला बन्द भएका सार्वजनिक यातायातका साधन पूर्णरूपमा सञ्चालन नहुँदा यात्रुले कठिनाइ भोगेका छन्। फूलपातीमा बन्द भएका सार्वजनिक यातायातको टिकट काउन्टर सञ्चालन नहुँदा यात्रुहरू तोकिएकोभन्दा बढी भाडा तिर्न र कष्टकर यात्रा गर्न बाध्य भएका हुन्।
यातायात व्यवसायीले दशैँ पर्वमा पर्याप्त सङ्ख्यामा गाडी सञ्चालनमा रहेको दाबी गरे पनि यात्रुको सङ्ख्यामा वृद्धि र गाडी नियमितभन्दा निकै कम सञ्चालन भएको जिल्ला प्रहरी प्रमुख एसपी वसन्तबहादुर कुँवरले जानकारी दिए।
बन्द रहेका टिकट काउन्टर अझै सञ्चालन नहुँदा जिल्लामा सञ्चालित नियमित गाडी निकै कम चलेका छन्। ती गाडीले तोकिएको भन्दा बढी यात्रु बोक्ने र बढी भाडा असुल गरेको सूचनाको आधारमा आइतबार एकैदिन २४९ सवारी साधन कारवाहीमा परेको कुँवरले बताए।
ती सवारीबाट एक लाख ८१ हजार ५०० रुपैयाँ राजस्व सङ्कलन भएको जिल्ला ट्राफिक प्रमुख प्रहरी नायब निरीक्षक नरहरि अधिकारीले जानकारी दिए। सामान्य समयको भन्दा निकै कम सङ्ख्यामा गाडी चलेको अवस्थामा पनि धेरै गुणा बढी राजस्व संकलन भएको उनले बताए।
दशैँको समयमा यात्रुको सङ्ख्या वृद्धि हुने भएकाले यातायात व्यवसायीसँग समन्वय गरी पर्याप्त सङ्ख्यामा गाडी सञ्चालन गराउन प्रशासनले पहल नगर्दा यात्रुले क्षमताभन्दा बढी यात्रु भएर आवतजावत गर्न र बढी भाडा तिर्न बाध्य भएको बेलकोटगढी नपा–६ का नवराज पनेरुले गुनासो गरे।
तपाईंको ईमेल गोप्य राखिनेछ ।