काठमाडौं : निजी क्षेत्रका जलविद्युत् कम्पनीको साधारण शेयर बिक्न समस्या परिरहेका बेला माथिल्लो तामाकोशी जलविद्युत् आयोजनाको साधारण शेयरमा नागरिकको उल्लेख्य सहभागिता भएको छ। यही कात्तिक १५ गते बिहीबारदेखि बिक्री शुरु भएको सो कम्पनीको साधारण शेयरमा आज साँझसम्म करीब रु चार अर्ब बराबरको आवेदन परेको छ।
माथिल्लो तामाकोशी आयोजनाका प्रवक्ता डा गणेश न्यौपानेका अनुसार आइतबार साँझसम्म दुई लाख छ हजार ९९१ जनाले तीन अर्ब ९९ करोड ७१ लाख रुपैयाँ बराबरको आवेदन दिएका छन्। कम्पनीले एक अर्ब ५८ करोड रुपैयाँ बराबरको साधारण शेयर बिक्री गरेको हो।
कम्पनीले सोमबारसम्म आवेदन दिने म्याद तोकेको छ। शेयर बिक्री प्रबन्धकमा नागरिक लगानी कोष र सनराइज क्यापिटल रहेका छन्। कम्पनीले दोलखाको लामाबगरमा ४५६ मेगावाट क्षमताको आयोजना निर्माण गरिरहेको छ। आयोजनाको कूल भौतिक प्रगति ९७ प्रतिशत रहेको छ । 'नागरिकको उल्लेख्य सहभागिताले आफूहरुलाई उत्साहित बनाएको र सरकारी स्वामित्वका कम्पनी वा संस्थाप्रति विश्वास रहेकोसमेत पुष्टि भएको छ', प्रवक्ता डा न्यौपानेले भने।
सोमबारसम्म थप एक अर्बदेखि डेढ अर्ब रुपैयाँसम्मको आवेदन पर्नसक्ने सम्भावना रहेको उनको भनाइ छ। कम्पनीले निकट भविष्यमा नै रोलवालिङ जलविद्युत् आयोजना निर्माण गर्ने तयारी गरेको छ।
तपाईंको ईमेल गोप्य राखिनेछ ।