क्यामरूनमा हतियारधारीद्वारा अपहरित ७९ जना विद्यार्थीलाई नियन्त्रणमुक्त गरिएको छ। गत सोमबार अपहरित उनीहरूलाई सकुशल नियन्त्रण मुक्त गरिएको क्यामरूनका सञ्चार मन्त्रीले बुधबार एएफपीलाई जानकारी दिए।
अपहरण मुक्त भएकाको बारेमा विस्तृत विवरण भने अहिले दिइएको छैन। फ्रान्स भाषीको बाहुल्यता रहेको देशको अंग्रेजी भाषीको बाहुल्यता रहेको ठाउँबाट उनीहरूलाई अपहरण गरिएको हो। उक्त क्षेत्रलाई क्यामरूनबाट छुट्ट्याउन सङ्घर्ष गर्दै आएको समूहले विद्यार्थीलाई अपहरण गरेको सरकारी अधिकारीले जनाएका छन्।
विद्यालय सञ्चालन भइरहेको समय विद्रोहीको एक सशस्त्र समूह प्रेस्बिटरियन माध्यमिक विद्यालय, वामेडामा प्रवेश गरी विद्यालयका प्रिन्सिपल, एक शिक्षक र बस चालकलाइसमेत विद्यार्थीसँगै लगेको थियो। उक्त क्षेत्र क्यामरूनको उत्तरपश्चिममा पर्छ।
क्यामरूनमा हुँदै आएको १३ महिने अशान्तिका कारण भएको यो अपहरणको घटना अहिलेसम्मकै ठूलो भएको बताइएको छ। क्यामरूनमा विगत ३५ वर्षदेखि राजनीतिक नेतृत्वमा रहेका ८५ वर्षीय राष्ट्रपति पाउल बियाले गत अक्टोबरमा भएको निर्वाचनबाट सातौँ कार्यकालका लागि चुनिएको केही समयमा नै यो घटना भएको हो। यद्यपि निर्वाचन परिणाप्रति विपक्षीले धाँधली भएको बताउँदै असन्तुष्टि जनाउँदै आएका छन्।
निर्वाचनमा बियाले ७१.३ प्रतिशत मत प्राप्त गरी जितेको दावी गरिए पनि निर्वाचनमा सरकारी अधिकारीले नै हुलदंगा मच्चाएर निम्न संख्यामा सहभागिता भएको विपक्षीको आरोप राष्ट्रपतिमाथि छ। क्यामरूनमा दुई करोड २० लाख अंग्रेजी भाषी नागरिक छन् र अल्पसंख्यक उनीहरू आफ्नो भू–भागलाई स्वतन्त्र गरिनुपर्ने बताउँदै आएका छन्। विश्व युद्धपूर्व क्यामरून जर्मनीको कोलोनीका रूपमा रहेकोमा विश्वयुद्धपछि बेलायत र जर्मनीको अधिनमा गएको थियो।
सन् २०१६ मा स्वतन्त्रताका लागि आवाज उठाए पनि अंग्रेजी भाषीलाई बियाले राज्यशक्तिको बलमा दबाएका थिए। सन् २०१७ को अक्टोबर १ मा एङ्लोफोन समुदायले देशको उत्तरपश्चिमी तथा दक्षिण पश्चिमी क्षेत्रलाई अम्बाजोनिया गणतन्त्रका रूपमा घोषणा गरेका थिए तर यसलाई कुनै पनि राष्ट्रले मान्यता दिएको छैन। क्यारूनमा भएका विभिन्न हिंसात्मक आन्दोलनमा परी ४०० नागरिकको मृत्यु भएको छ भने १७५ सुरक्षाकर्मीले ज्यान गुमाएका छन्।
तपाईंको ईमेल गोप्य राखिनेछ ।