दश जना मध्यअमेरिकी आप्रवासी महिलाले अमेरिका प्रवेशको माग गर्दै संयुक्तराज्य अमेरिका र मेक्सिकोको सीमामा भोक हड्ताल शुरु गर्ने घोषणा गरेका छन्।
'हाम्रो आवाज कसैले सुनेन, त्यसैले महिला आन्दोलन गर्ने निर्णयमा हामी पुगेका छौँ र हामी भोक हड्ताल गर्दैछौँ,' होन्डुरसकी क्लाउडिया मिरान्डाले बताइन्। तिजुआनमा आयोजित पत्रकार सम्मेलनमा उनले अमेरिकी अधिकारीहरूले आप्रवासीको रूपमा अमेरिका प्रवेश गर्न र आवेदनसमेत लिन अस्वीकार गरेकामा आक्रोश व्यक्त गरिन्।
उत्तरी मेक्सिको शहर तिजुआनामा हाल ६ हजारभन्दा बढी मध्यअमेरिकीहरू अमेरिका प्रवेशको पर्खाइमा शिविरमा बसिरहेका छन्। खासगरी होन्डुरसका यी मानिसहरू आफ्नो देशमा व्याप्त गरिबी र हिंसाबाट आक्रान्त भएर देश छाड्न बाध्य भएको बताउँछन्।
अमेरिकी राष्ट्रपति डोनाल्ड ट्रम्पले अमेरिकी आप्रवास नीतिमै परिवर्तन गर्ने सोचाईमा छन्। उनले मध्यअमेरिकी आप्रवासीहरू आपराधिक पृष्ठभूमिका रहेकाले स्वीकार नगर्ने बताए।
सीमाक्षेत्रमा हाल हजारौं सैनिक परिचालन गरिएको छ। भोक हड्तालमा उत्रने घोषणा गरेका महिलाहरूले मेक्सिकोमा बस्न चाहने आप्रवासीलाई मानवीय आधारमा भिसा दिन पनि मेक्सिकाली अधिकारीहरूसँग आग्रह गरेका छन्। उनीहरूले आफ्नो भोक हड्ताल कति दिन गर्ने भन्ने बारेमा अझै निर्णय गरेका छैनन्।
अमेरिकाको दक्षिणी सीमासम्म आइपुग्न करिब चार हजार किलोमिटर यात्रा गरेका होन्डुरसका करिब ५०० आप्रवासीले आइतबार अमेरिकी सीमाभित्र प्रवेश गर्ने प्रयत्न गरेका थिए। तर उनीहरूलाई अमेरिकी सीमा सुरक्षा फौजले फिर्ता पठाएको थियो। सुरक्षा फौजले अश्रुग्यास र रबरका गोली प्रहार गरेको थियो।
तपाईंको ईमेल गोप्य राखिनेछ ।