काठमाडौं : सम्पादक समाज नेपालले यस वर्षको ‘गोविन्द वियोगी पत्रकारिता पुरस्कार–२०७५’ अन्नपूर्ण पोस्ट् दैनिकका प्रधान सम्पादक हरिबहादुर थापालाई र ‘गोविन्द वियोगी विशेष पत्रकारिता पुरस्कार–२०७५’ ईमेज च्यानल टेलिभिजनका समाचार सम्पादक डिल्लीराम बसेललाई प्रदान गरिने भएको छ। सम्पादक समाज नेपालले विज्ञप्ति जारी गर्दै यस्तो जानकारी गराएको हो।
यस्तै वरिष्ठ पत्रकार हरिहर विरही र रघुजी पन्तलाई ‘वरिष्ठ पत्रकार’बाट सम्मानित गर्ने निर्णय गरेको समाजका महासचिव श्याम डोटेलले बताए। सम्पादक समाज नेपालका संस्थापक अध्यक्ष गोविन्द वियोगीको स्मृतिमा स्थापना गरिएका पुरस्कारको राशि क्रमशः २५,००१।- र १५,००१।- रहेको छ।
उक्त पुरस्कार तथा सम्मान अघिल्ला वर्ष झैँ यस वर्ष पनि गोविन्द वियोगीको स्मृति दिवसको अवसरमा हस्तान्तरण गरिने समाजका महासचिव डोटेलले बताए। उनका अनुसार १४औँ गोविन्द वियोगी स्मृति दिवसको अवसरमा यही माघ ५ गते शनिबार पूर्वप्रधानमन्त्री माधवकुमार नेपालले पुरस्कार तथा सम्मान प्रदान गर्ने कार्यक्रम रहेको छ।
तपाईंको ईमेल गोप्य राखिनेछ ।