राजनीति

नगरप्रमुखसँग भनाभन भएपछि मन्त्रालय पुगे प्रशासकीय अधिकृत
SHARES

फागुन ३०, २०७५

    भक्तपुर : योजनाहरूको रकम निकासा विषयमा मध्यपुर थिमि नगरपालिकाका प्रमुख मदनसुन्दर श्रेष्ठ र प्रमुख प्रशासकीय अधिकृत कमल ज्ञवालीबीच विवाद भएको छ। विवादका आइतबार कार्यकक्ष छाडेर गएका ज्ञवाली बुधवारसम्म कार्यालय फर्किएका छैनन्।

    नगरप्रमुख श्रेष्ठले भने संघीय मामिला तथा सामान्य प्रशासन मन्त्रालयसँग नयाँ प्रशासकीय अधिकृत माग गरेका छन्।

    स्रोतका अनुसार प्रमुख श्रेष्ठ र ज्ञवालीबीच ज्ञवालीको कार्यकक्षमा भनाभन भएको थियो। प्रदेश सांसद राजेन्द्रमान श्रेष्ठसमेत उपस्थित छलफलमा प्रमुख श्रेष्ठले बिस्केट जात्रालाई लक्ष्य गरी १२ वटा योजनाका रकम निकासा गर्न दबाब दिएपछि प्रशासकीय अधिकृत ज्ञवालीले आर्थिक नियमावलीविपरीत रकम निकासा गर्न नसक्ने भनी प्रतिवाद गरेका थिए। त्यसपछि दुवैजनाबीच भनाभन भएको स्रोतले जानकारी दियो। 

    मध्यपुर थिमि नगरपालिकाले एक महिना अघि आसन्न बिस्काः जात्रालाई लक्षित गरेर विभिन्न १२ वटा योजना सुरु गरेको थियो। नपाले दुई महिनाभित्र सम्पन्न गर्ने गरी ३६ देखि ४० लाखको लागतमा शंखधरचोक–हनुमन्ते पुल सडक कालोपत्रे, शंखधर चोक–टिबी अस्पताल सर्भिस ट्याक खोल्ने र टेवा पर्खाल निर्माण, विष्णुवीर जात्रामार्गमा ढुंगा छपाइ र पर्खाल निर्माण, ४० लाख लागतको फोहोर मैला व्यवस्थापन केन्द्र जाने सडक कालोपत्रे याेजना सुरु भएका थिए।

    यसैगरी करिब ८० लाखको लागतमा आगामी चैत्र १३ गते उद्घाटन गर्ने लक्ष्य राखिएको विष्णुकुण्ड पुनः निर्माण, शंखधरचोकमा ढुंगेधारासहितको अपाङ्गमैत्री पार्क निर्माण, नगदेश साकोताहास्थित तीन मिटरको सडक आठ मिटरको चौडा बनाउने, शंखधर सामुदायिक भवनको डीपीसीसम्मको निर्माण, करिब एक करोड लागतमा बालकुमारी मन्दिरको जिर्णोद्धार, ६२ लाखमा दुईपोखरी जिर्णोद्धार तथा पुनःनिर्माण, तछुटोलस्थित पाटी निर्माणलगायतका योजना पनि थालिएको थियो। 

    स्रोतका अनुसार मध्यपुर थिमि–४ स्थित बालकुमारी मन्दिर जिर्णोद्धारको काम बिस्काः जात्रालाई सम्पन्न गर्न उपभोक्ता समिति मार्फत कार्य भइरहे पनि योजनाको अन्तिम लागतको टुंगो लागेको छैन। योजनाको लागत रकमको अन्तिम टुंगो नलागेपनि नपाले १५ लाख रुपैयाँ निकासा गरिसकेको छ। सो योजानाको सम्बन्धमा उपभोक्ता समिति र नगरपालिकाबीच योजना कार्यान्वयनको सम्झौता समेत भएको छैन। सम्झौता नभई रकम निकासा गरी काम भइरहे पनि थप रकम निकासा गर्न नगरप्रमुख श्रेष्ठले दबाब दिएको स्रोतको दाबी छ। त्यसैगरी आगामी बिस्काः जात्रामा पानी भरिसक्ने गरी दुईपोखरीको एउटा पोखरीको पुनर्निर्माणमा समेत नगरप्रमुख श्रेष्ठ र ज्ञवालीबीच विवाद भएको थियो। 

    नगरप्रमुख श्रेष्ठले प्रशासकीय अधिकृत ज्ञवालीले उपभोक्ता समितिमार्फत सञ्चालन भइरहेका योजनाहरुको रकम निकासा गर्न आनाकानी गर्ने, उपभोक्ता समितिहरूलाई अनावश्यक दुःख दिने गरेको गुनासो गरे। उनले यस सम्बन्धमा पटक पटक ज्ञवालीलाई त्यसो नगर्न आग्रह गर्दा वास्ता नगरेको बताए। उनले भने, ‘प्रशासकीय अधिकृत ज्ञवालीले उपभोक्ता समितिहरूलाई अनावश्यक दुःख दिने, हप्कीदप्की गर्दै आएका थिए। पटक पटक सचेत गर्दा पनि उनी सुध्रिएनन्।’ 

    नगरप्रमुखसँगको विवादपछि मन्त्रालयमा हाजिर गर्दै आएका ज्ञवाली उपप्रमुख र केही वडाअध्यक्षहरुको साथ लिएर पुनः नपा फर्किने कसरतमा लागेको आरोप लगाउँदै नगरप्रमुख श्रेष्ठले त्यसो गरिय सह्य नहुने र ज्ञवालीलाई साथ दिने जनप्रतिनिधिहरूलाई समेत कारवाही गर्ने बताए। उनले नपाको आर्थिक कारोवारका लागि वरिष्ठ कानुन अधिकृत केशव सिलवाललाई अधिकार प्रत्योजित गर्न मन्त्रालयमा माग गरेको जानकारी दिए। 

    यो विषयमा ज्ञवालीसँग सम्पर्क गर्दा सम्पर्क हुन सकेन। उनको मोबाइल 'स्विच अफ' गरिएको छ।

    दुई वर्षदेखि मध्यपुर थिमि नगरपालिकामा रहेका ज्ञवालीले कर्मचारी समायोजनका क्रममा मध्यपुर थिमी नै कार्यक्षेत्र माग गरेका थिए। उनलाई मन्त्रालयले गत फागुन २२ गते मात्र मध्यपुर थिमी कार्यक्षेत्र रहने गरी समायोजन पत्र दिएको थियो।
     

लक्ष्मी गारु

गारु थाहा खबरका भक्तपुर समाचादाता हुन्।

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]