डडेल्धुरा : डडेल्धुरामा कालाजारका बिरामी भेटिएका छन्। जिल्लाको उत्तरपूर्वी क्षेत्रको अजयमेरु गाउँपालिका–६ का एक युवकमा कालाजार भेटिएको हो।
अजयमेरुका २१ वर्षीय बिपी जोशीलाई कालाजारको संक्रमण देखापरेको डडेल्धुरा अस्पतालका प्रयोगशला विभागका इन्चार्ज ल्याब अधिकृत इश्वरीप्रसाद भुसालले जानकारी दिए।
यो समयमा कालाजार, डेंगु, स्क्रबटाइफस, झाडापखाला लगायतको महामारी फैलिने सम्भावना रहन्छ। गत वर्ष डडेल्धुरा लगायत सुदूरपश्चिम प्रदेशमा स्क्रबटाइफस ज्वरो महामारीकै रुपमा फैलिएको थियो।
तराईको रोग भनेर चिनिएको कालाजार पछिल्लो सयम पहाडि जिल्लातिर सर्दै गएको छ। यो रोग उत्पन्न गर्ने भुसुना (सैन्डफ्लाई) पहाडी तथा हिमाली जिल्लामा समेत देखिन थालेको छ।
जलवायु परिवर्तन र तराईबाट पहाडतिर गाडीमा सामान लाने क्रम बढेका कारण पहाडी जिल्लामा कालाजारको असर देखिन थालेको अस्पतालका प्रयोगशला विभागका इन्चार्ज ल्याब अधिकृत भुसालको भनाइ छ।
कालाजार सार्ने भुसुनाको आकार लामखुट्टेको दाँजोमा एक चौथाइ मात्र हुन्छ। भुसुनाको शरीरको लम्बाइ १.५ मिलिमिटरदेखि ३.५ मिलिमिटरको बीचमा हुन्छ। यस्ता भुसुना माटाको घरमा राम्ररी हुर्किन्छन्। पोथी भुसुनाले जनावर वा मनुष्यको रगत चुस्ने क्रममा रोगका किटाणु सार्छ। यो रोग सुरुवाती अवस्थामै पहिचान गरेर उपचार गर्नु उत्तम हुन्छ।
कालाजार हल्का ज्वरो र कमजोरीले सुरु हुन्छ र तीव्र ज्वरो, रक्तअल्पता, कलेजो दुख्नु, चिढिनु, छाला कालो हुनु, पेट फुल्नु, कमजोरीजस्तो लक्षणमा परिणत हुन्छ। बेलैमा उपचार नभए बिरामीको मृत्यु समेत हुनसक्ने डडेल्धुरा अस्पतालका मेसु डा जितेन्द्र कँडेलले बताए।
तपाईंको ईमेल गोप्य राखिनेछ ।