|

काभ्रेपलाञ्चोक : बेपत्ता भएको ९१ वर्षपछि ‘मृत्यु’ भएको मान्दै नमोबुद्ध नगरपालिका ८ डराउनेपोखरीस्थित अधिकारीथोकका एक परिवारका सदस्यले हिन्दू संस्कारअनुसार काजकीरिया थालेका छन्।

जन्मले १०० वर्ष पुगेका नन्दीकेशर अधिकारी (बैकुण्ठ) को हिन्दू संस्कारअनुसार काजकीरिया थालिएको हो। गत मंगलबार कुशको ‘शव’ बनाएर अधिकारीको अन्तिम संस्कार गरिएको छ। सोही दिनदेखि नन्दीकेशरको भाइका एक नातिकुमार अधिकारी कोरा बारेर १३ दिनकै कीरिया बसेका छन्।

मान्छेको मृत्यु भएपछि हिन्दू परम्पराअनुसार १३ दिनसम्म कोरा बस्ने, अलिनो खाने, शुभकार्य नगर्ने, बन्धु र आफन्तले सीदा ल्याउने, शोक प्रकट गर्नेलगायतको एउटै प्रक्रिया हुने नन्दीकेशरका अर्का नाति राजनप्रसाद अधिकारीले जानकारी दिए। हिन्दू संस्कारमा ‘नारायणवली’ भनिने यो प्रक्रियामा बेपत्ता भएको मानिस १०० वर्ष हुँदासम्म पनि फेला नपरे मृत्यु भएको मानेर अन्तिम संस्कार गर्ने चलन रहँदै आएको छ।

राजनका अनुसार विसं १९६५ मा जन्मिनुभएका नन्दीकेशर १९८५ मा परदेश जानुभएको थियो। 'हजुरबुबा विदेशिएदेखि नै बेपत्ता हुनुभएपछि हिन्दू संस्कारअनुसार अहिले काजकीरिया गर्दैछौँ', राजनले भने। सात वर्षको उमेरमा विवाह गर्नुभएका नन्दीकेशरकी श्रीमती बेदमायाको पनि विसं २०४२ मा मृत्यु भइसकेको छ। उनीहरूबाट कुनै जायजन्म भएको थिएन।

मुलुकी देवानी संहिता २०७४ को भाग २ व्यक्तिसम्बन्धी कानुनको परिच्छेद १ को प्राकृतिक व्यक्तिसम्बन्धी व्यवस्थामा कुनै व्यक्ति बिनासूचना लगातार १२ वर्षदेखि बेपत्ता भएमा वा त्यस्तो व्यक्तिको सम्बन्धमा स्वाभाविक रूपमा जानकारी पाउने व्यक्तिले १२ वर्षदेखि कुनै जानकारी नपाएमा त्यस्तो व्यक्ति जीवित रहेको प्रमाण प्राप्त भएकोमा बाहेक त्यस्तो व्यक्तिको मृत्यु भएको मानिने उल्लेख छ।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.