काठमाडौं : नेपालका प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीले मोतिहारी–अमलेखगन्ज पेट्रोलियम पाइपलाइनको संयुक्त रूपमा उद्घाटन गरेका छन्।
प्रधानमन्त्रीद्वय ओली र मोदीले मंगलबार क्रमशः काठमाडौंको सिंहदरबार र दिल्लीको हैदरावाद हाउसबाट मोतिहारी-अमलेखगन्ज पेट्रोलियम पाइपलाइनको रिमोटबाट उद्घाटन गरेका हुन्।
उद्घाटन कार्यक्रम पछि भिडियो कन्फ्रेन्समार्फत ओली र मोदीले आफ्ना धारणा राखेका थिए।
प्रधानमन्त्री ओलीले आजबाट नै नेपालमा पेट्रोल र डिजेलको मूल्य प्रतिलिटर २ रुपैयाँले घटेको जानकारी गराएका थिए। ओलीले भने, 'ट्रेड र ट्रान्जिटलाई ध्यानमा राखेर गरिएको यो महत्वपूर्ण परियोजना हो। यसलाई कार्यान्वनमा ल्याउनका लागि भारत सरकार र प्रधानमन्त्री मोदीले खेलेको भूमिकाका लागि धन्यवाद ज्ञापन गर्न चाहन्छु।'
भारतले नेपालमा विभिन्न परियोजना संयुक्त रूपमा निर्माणका लागि अगाडि बढाएको र तिनलाई सम्पन्न गर्नका लागि भूमिका खेल्न पनि प्रधानमन्त्री ओलीले मोदीलाई आग्रह गरेका थिए। उनले मोदीलाई नेपाल भ्रमणको निम्तो पनि दिएका थिए।
जवाफमा मोदीले नेपाल- भारत सम्बन्ध बलियो बनाउनका लागि आफूले सक्दो भूमिका निर्वाह गर्ने बताएका थिए। उनले भने, 'हाम्रो साझेदारी अझ बलियो बनाउने र नयाँ नयाँ क्षेत्रमा लगानी गर्नका लागि हामी एकसाथ छौँ। विभिन्न परियोजना समयमा पूरा गर्नमा हामी दुवै सरकारको प्राथमिकता रहेको छ। यो परियोजना अहिले सम्पन्न भएको छ र आगामी दिनमा बाँकी काम सम्पन्न हुनेछन्।'
मोदीले थपे, 'यो दक्षिण एसियाको पहिलो सीमापार पेट्रोलियम लाइन हो। यो परियोजना समयसीमाभन्दा पहिले नै सम्पन्न भएकोमा नेपाल सरकारको नेतृत्व र हाम्रो संयुक्त प्रयासबाट भएको हो।'
यो परियोजना सम्पन्न भएकोमा आफूलाई खुसी लागेको मोदीले बताएका थिए। 'यो काम नेपालको सामान्य नागरिकको भलाईको लागि भएको हो। यसमा हामीलाई साँक्षी र भागीदार बन्ने मौका मिलेकोमा सन्तोष मिलेको छ', मोदीले भने।
मोदीले नेपालमा विविध क्षेत्रमा साझेदारी बढाउन आफू र भारत सरकार तयार रहेको बताएका थिए। उनले नेपालमा लगानी गर्न भारत प्रतिबद्ध रहेको बताएका थिए। उनले नेपाल-भारत सम्बन्धको आधार जनता भएको र राजनीतिक तहमा पनि अभूतपूर्व सम्बन्ध रहेको बताएका थिए।
प्रधानमन्त्री ओलीको स्वास्थ्यलाभको कामना गर्दै मोदीले आफू छिट्टै नेपाल आउन चाहेको पनि बताएका थिए।
हेर्नुहोस् भिडियोः
तपाईंको ईमेल गोप्य राखिनेछ ।