दाङ : नेपाली कांग्रेसका सभापति शेरबहादुर देउवाले बाँके घटनाका दोषीलाई कारबाही नभए संसद चल्न नदिने चेतवानी दिए।
नेपाली कांग्रेस दाङले शुक्रबार दाङको घोराहीमा बिपी कोइरालाको शालिक अनावरण कार्यक्रममा बोल्दै सभापति देउवाले जागरण अभियानका क्रममा बिहीबार बाँके सभापति किरण कोइरालासहित आफ्ना दर्जनौँ कार्यकर्ता घाइते भएको भन्दै तत्काल दोषीलाई कारबाहीको दायरामा ल्याउन आग्रह गरे।
प्रतिपक्ष दलको नेता समेत रहेका देउवाले शान्तिपूर्ण रुपमा कार्यक्रम गर्ने अधिकार भएको भन्दै उक्त घटनाको निन्दा गर्दै कुनै पनि हालतमा दोषीलाई कारबाही गर्न माग गरे।
शान्तिपूर्ण कार्यक्रममा भएको आक्रमणले लोकतन्त्रको धज्जी उडाएको उनले आरोप लगाए। त्यसैगरी सभापति देउवाले पार्टीलाई भावनात्मक रुपमै एक ढिक्का बनाउने गरी जागरण अभियानलाई सदुपयोग गर्न कार्यकर्तालाई निर्देशन दिए। सरकारलाई खबरदारी र पार्टीभित्र आन्तरिक तथा बाह्यरुपमा एकता भएर अघि बढ्न उनले निर्देशन दिए।
कार्यक्रममा केन्द्रीय सदस्य दिपक गिरी, किशोरसिंह राठौर, शिला खड्का लगायतका नेताहरुले पार्टी भित्रको गुट उपगुटको संस्कारलाई त्याग्न सुझाव दिएका थिए। अरुको कारणले भन्दा पनि आफ्नै कारणले गर्दा कांग्रेस कमजोर हुन गएको भन्दै नेताबाटै सुधारको आवश्यक रहेको बताएका छन्।
सभापतिले शनिबार तुलसीपुरमा विपीको शालिक अनावरण गर्ने कार्यक्रम रहेको छ।
तपाईंको ईमेल गोप्य राखिनेछ ।